القهوة على أسمها قهوة (أحلف).. مكان رايق نجتمع ندردش فيه وتحصل فيه كل أنواع السوالف الي تحبها لكن بأسلوب إقلاعي بعيد عن التكلف و الفصحى أو الدندرة في نقاشات مالها سنع..
القصص العيارية مرحب فيها طبعاً.. و سوالف شخصية ممكن حصلت لأحد أو سمع عنها يصيغها العضو/ة بأسلوبه وطريقته.. آخر الأحداث والمستجدات في مجتمعنا الكل يشارك فيها هنا ويطرحها للنقاش.. وبرضه مواضيع عامة ما تخضع لأي نظام منتدى ثاني .



عادي أكتب أي شي في القهوة؟
أول شي وش تبي تكتب؟.. إذا هي خاطرة أدبية أو قصيدة فعندك الأدبي.. و إذا جايزلك مسلسل رح سولف عنه في منتدى الـtv.. و إذا ماسكة معك فلسفة ذاك اليوم وحاس أن فيه تناسخ أرواح بينك وبين فيصل القاسم سيّر على الجادة.. شيكوا على المواضيع المثبتة والمميزة في القهوة حتى تتضح الصورة أكثر..



موضوعي تقفل ليش الاستقعاد هذا؟
السالفة مهيب استقعاد وخل عنك الحساسية الي مالها داعي.. كلنا حبايب هنا.. موضوعك يا أنه أنطرحت فكرته كثير وفي أوقات متقاربة أو أنه موضوع تعبان(ن) فيه بس أنه هذرة سوالف مالها أول ولا آخر.. الأعضاء والزوار هنا يبون يقرون شي جديد وأفكار غير مستهلكة..



موضوعي لقيته في الي ردوا مسوين ظريفين علي!!
أول شغلة كل أعضاء الاستراحه ظريفين وخفيفين دم http://vb.eqla3.com/images/smilies/004.gif ولا ذبوا عليك إلا أنك مهيئ لكذا و أنت جبت هالشي لنفسك http://vb.eqla3.com/images/smilies/S_45.gif.. تحط موضوع ماله سنع --> تحمّل ما يجيك.. ولا تحسب أن أيقونة "إضافة موضوع" شغلة سهلة.. بعض الأعضاء يجلس أسابيع يحضّر لموضوعه ويجمع صور ويرتب أفكاره و ينهد حيله.. و أنت قاعد تتصفح فيك غلقة أو توك قايم من النوم وعلطول إضافة موضوع بدون أي فكرة أو تنسيق http://vb.eqla3.com/images/smilies/026.gif ويمكن موضوعك سطرين بس تسأل عن أقرب فرع لتي شوز عند بيتكم!.. برضه يمكن موضوعك منقول من قوقل أو أي منتدى ثاني وهذا شي مرفوض وفيها دم http://vb.eqla3.com/images/smilies/n/sm4.gif..
طبعاً مواضيع رحبوا فيني هذي ماراح نتكلم عنها لأن العبرة بما تراه لا ما تسمعه http://vb.eqla3.com/images/smilies/biggrin.gif..



لي كم رد أنحذف وأنا متأكد والله أني كاتبها
لا تحلف مصدقينك http://vb.eqla3.com/images/smilies/biggrin.gif.. ردك أنحذف لأنه من نمونة هالردود:
يسلمووو
يعطيك العافية
فعلاً هذا الي صاير
وش صار كمل القصة
متابعـ/ـة
أو أنك توزع ورد و ابتسامات بدون إضافة كلام..
أنت إذا كتبت موضوع تحب تشوف الردود متفاعلة معك وتحسسك أنها قرت موضوعك وفيه اقتباسات.. لكن عضو/ة يكتب موضوع مميز أو حتى غير مميز لكن ردك كلمة كلمتين فمعليش الشي هذا ما نقبله فيذا..
شغلة ثانية.. ومحشومين حبايبي.. لكن أحياناً يجيك الواحد مطنقر لسبب ما و يكتب كلمة أو رد مهوب يم جادة أبد.. في هالحالة شي طبيعي بينحذف الرد و يمكن يصير محاسبة للي كتبه..
خلك مروق و أنت تقرأ وتكتب http://vb.eqla3.com/attachment.php?a...1&d=1161786274.. و زي ما قلنا فوق، القهوة مكان ندخلها نفق كشرتنا و نضحك و نبتسم ونطلع منها وحنا نتنهد (طالع من ليلة دخلة مهوب منتدى)..



عادي أشتشت؟
لا




برضه لا http://vb.eqla3.com/attachment.php?a...1&d=1161786274..إلا تسانك بتذب على راعي الموضوع فهذا شي ثاني http://vb.eqla3.com/images/smilies/biggrin.gif



لساني يحكني ودي أذب بس منيب أمون على أحد http://vb.eqla3.com/images/smilies/confused.gif..
ذب و ماجاك علي http://vb.eqla3.com/images/smilies/biggrin.gif ولا تقول هذا يوزر برتقالي أو أسود أو توه جديد.. الذب بصمة إقلاعية مميزة http://vb.eqla3.com/images/smilies/004.gif.. و إذا ما صار لك عيارة هنا تلاحقك في كل موضوع فأنت منت إقلاعي http://vb.eqla3.com/images/smilies/biggrin.gif.. لكن - ولا يحتاج نقولها - فيه فرق بين الذب و الكلام السامج http://vb.eqla3.com/attachment.php?a...1&d=1161786274 أو استخدام الألفاظ الي مالها سنع و جارحة.. وكل كلام ينكتب الشخص مسؤول عنه وعن عواقبه.



+ + + + + + + + + + + + + + + + + +



بالنسبة للأعضاء الجدد أو الأعضاء المخضرمين لكنهم ما يكتبون مواضيع.. سيروا على المواضيع المثبتة والمميزة و أكتبوا.. لحد يحقر عمره يقول ما أعرف أو ما عندي أسلوب أو أنا بس أحب أرد.. كلنا عندنا تجارب وخبرات وقصص وكل واحد منا فيه مسيلمة كذاب جواته يعني أكتبوا وهلسوا علينا http://vb.eqla3.com/images/smilies/biggrin.gif.. أنت ماراح تكتب شهادتك على العصر.. و أحلى المواضيع هي الأفكار الحلوة الي تنصاغ على شكل قصة إقلاعية.. وإذا راح موضوعك عادي.. صح بيمغصك بطنك يومين وبتحس أن الدنيا ماعاد فيها خير http://vb.eqla3.com/images/smilies/biggrin.gif بس صدقني عادي.. ثلاث أرباع المشرفين و رؤساء الأقسام في المنتدى سيروا عليها.. فيه مشرف منيب قايل أسمه له ثمان مواضيع هناك http://vb.eqla3.com/images/smilies/grins.gif وهذاهو مشرف أد الدنيا..
+ + + + + + + + + + + + + + + + + +



تبقى شغلة أخيرة.. كلنا مسلمين و قايمين بفرضنا الحمد لله.. وشي حلو التذكير من وقت لوقت.. لكن تنزل مجموعة مواضيع في فترة يومين ثلاثة و كلها وعظ ما يصلح.. بإمكانك تنصح و تذكر لكن بأسلوب جذاب أفضل من الكتابة بالفصحى و نصف الموضوع لوم للذات و تخويف!.. ما فيه مانع أنه يكون موضوع وعظ بأسلوب إقلاعي، وش الي يمنع؟.. ليش متصورين أن النصيحة لازم تكون جامدة ومتخشبة؟.. وهذا يرجعنا للنقطة الي فوق الي عن تقفيل المواضيع.. المواضيع الي أفكارها متشابهة سواء وعظ أو غيره راح تقفل..



+ + + + + + + + + + + + + + + + + +



و الخاص مفتوح لأي استفسار أو مساعدة لا عدمنا طلتكم البهية (بس الواحد يصير مفرش قبل لا يذب خشته http://vb.eqla3.com/images/smilies/biggrin.gif).. حنا ديمقراطيين و أهم شي عندنا الشعب http://vb.eqla3.com/images/smilies/biggrin.gif (وجه عادل إمام في مسرحية الزعيم)