سالفة خليف
 

أيها الأخوة في هذا المنتدى العزيز هو والمقيمين عليه على نفسي

نبدأ بالصلاة والسلام على رسول الأنام محمد صلى الله عليه وسلم

أما بعد:

إليكم سالفة (( خليف ))

وخليف هذا يااخواني شاب بدوي لم يدخل مدينة قط

بدوي همه الأول والأخير ((نياقه)) وعيشتهن وروحتهن وجيتهن

ويجيه خوين له من المدينة وقال له ياخليف شوري عليك تبيع هالماخوذات وتسكن المدينه

البل مابها إلا التعب وشفنا حنا مرتاحين بهالمدينه ومستانسين وعلومنا زينه وبخير ونعمه الله لايغير علينا إلا بالزين .
واقتنع خليف وكحوش نويقاته وقلعهن قلعة الأولين وباعهن .
وشراله بيت بالمدينة وسمعوا به جماعته وهم يدقونه كل يوم التعليله عند خليف من جايين من خليف
وين رايحين لـ خليف وانوخذ المسكين وبعد سنة قام يدور الواسطات عند الخيرين يامن يوظف خليف
وخليف ماعنده مقومات الوظيفه وكل مايجي لشركة أودائرة يسألونه وش اشتغلت ياخليف يقول راعي اباعر وماالله يوفقه ((وضيع النقلتين )) يعني صار خليف (( معايد القريتين )) .
وزادت همومه عليه وقام يشتكي من كل شي وجاه خويه المقرود اللي (قرده) بتسكين القاف وكسر الراء وأخذه للدكتور .
قال له الدكتور وش تشكي منه ياخليف
قال يادكتور أشكي من ((المهاوع)) الدايم بعد كل ماأقوم من مفطح .
- الدكتور : بلاك تدب فيها لين تقول العيد باكر لكن علاجك عندي وأنا أبو هندي قال خليف كفو والله يادكتور .
((تجيب جويفه وجعده ومرمريه ورجل الديك وعين الدجاجه وخشم الذيب وسن نعجه وشيح وحرمل وان لقيت الكعوب عند العطارين تراه معهن زين وتحطهن بتسدريه (قدريه) وتصب عليهن كاستين ماء من قليب حفر العتش وتشرب كل يوم كاس على الريتس (الريق )
قال زين يادكتور
واشتكى خليف من حب طالع بوجهه من جو المدينه .
الدكتور : تروح المطبخ وترفع غطى قدر الكبسه ليامنه فار وتتبخر به وثمن تجيب ثلج وتجيب ليفة المواعين الخشنه وبالثلج والليفه ادعك وجهك دعك دعك وحت بايديك الجلد الميت وبعدها تروح كل هالحبوب .
يقول خليف يادكتور حلقي يوجعني وصوتي مبحوح
- يضحك الدكتور ويقول هذي بسيطه ياخليف وعلاجها إمطخ زبده على الريق ولازم يكون مطخك للزبده كالآتي : ليامنك غرفتها بيدك اليمنى حطها بيدك اليسرى والحس اللي بقى من الزبده بيدك اليمنى وكررها مرتين ثلاث كل يوم لمدة ثلاث أيام وتروح البحه.
وقال خليف : يادكتور صفحتي كنك مدخلن بها مخطرن حامي أو ود بيت شعر وش أسوي يادكتور
قال الدكتور أعوذ بالله شلون متحمل الألم .
وروح خليف وهو مادرى ان دكتوره مايفهم .
وقام يتمنى خليف قبل النوم وجه الصبح لأنه أخذ عادة أهل المدينه بالنهار نوم وبالليل قوم.
يقول خليف وعمر اللي يقرا يطول:
[poem=font="Simplified Arabic,4,crimson,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
ياليت عند خليف خمسة ملايين .......وأربع فلل توجد بحي العليا
وأربع صوالينٍ على شكل لونين .....أحمر على أسود منيتي لو تهيا
وأربع بناتٍ كل أبوهن مزايين ....... أدناهن اللي مثل نجم الثريا
حتى ليامنه غدى الليل ليلين ........ كلن تقول (خليف) عندي هنيا [/poem]

مشاركة: سالفة خليف
 

اوخذ ياخليف بس والله ان امنياته سنعة خصوصا البيت الثالث يبري الجروح الغايره


طير شلوى هلابك وننتظر تحف اخرى

مشاركة: سالفة خليف
 

زنننننننسنسنسنس

مشاركة: سالفة خليف
 

ابو طلال يحسبني مثله مايدري اني اسوري ليلي من هموم العشق - بس تدري يابو طلال ان العشق له فايده كبيره ترضيك عني وهي اني ابقى ساهر الليل حتى اصلي الفجر ايش رايك هذا مايعتبر عشق مستحسن

واذا جريتين ماهي معجبتك يابو طلال ابشر اغيرها انا

مشاركة: سالفة خليف
 

يعطيك ألف عافيه على هذه القصه الطريفه والمفيده

مشاركة: سالفة خليف
 

شكلك : تمثل عابد الكوفة لكن من طرف آخر .
وبالنسبة لكملة ( جريتين ) ماعرفت أقراها . وبالنسبة للتغيير تحتاج تغييرات كثيرة ولو أني مافهمت الشيء الذي تريد تغييره .

مشاركة: سالفة خليف
 

أشكركم جزيل الشكر خيال الجدعا
أبوطلال
أبو وايل

ولكن ياابو طلال لو هالأمنيه تحقق لك بأيام البيوك الحمرا اللي أنا خابر

وش تسوي ههههههههههههههههههه بعدين اذا كانت مشكلتك بس (جريتين ) ياخي ولا تزعل

تكفى ياابو وايل غيرها ههههههههه
أما أبو وايل ان كان انه على خبري اللي عنده مكفيه والا تبوني أسولف لكم سالفة (غراف )

على اللي أخذ (حرمتين ) قدس الله سركم أيها الأخوه الأعزاء
بعدين أيها العزيز الغالي (أبو طليل ) المهم مو انك عرفت تقراها أو ماتقراها المهم

انك فهمت لغزها هذا أجمل شيئ عندي وأنا أخبرك كنز معلومات الله يحفظك

وأبو وايل العاشق الهواوي ( اللي يسوري الليول ) ويتحجج بصلاة الفجر
ههههههههههههههههههههه
(( أين الطريق إلى هواك فدلني )) ههههههههههه

[align=center]أخوكم
طير شلوى[/align]

مشاركة: سالفة خليف
 

الأخ طير شلوى
تعليق جميل ولكن سأترك الرد لأبو طلال

مشاركة: سالفة خليف
 

ويش هي سالفة غراف

مشاركة: سالفة خليف
 

وقام يتمنى خليف قبل النوم وجه الصبح لأنه أخذ عادة أهل المدينه بالنهار نوم وبالليل قوم.
يعني تقدر تقول راس خليف صار مخمٌر (بتشديد الميم )