منتديات الويلان - سعدون العواجي وأبناءه الجزء الخامس والأخير

وعقبها غزى فريح ولد عقاب مع غنيم الربضا بن بكر شيخ السويلمات على شمر وزعيمهم هايس القعيط ويم صارت المعركة وابتدى الكر والفر لاوالله ويجي فريح ولد عقاب ويخطف هايس من افرسه ويحط سيفه يم بطنه ويم راعي لوجهه هايس قال انت ولد عقاب ، اكيد انك ولد عقاب لانك تشبه مير انا ما ذبحت ابوك فقاله فريح ، قال انا مانشدتك عن هالشيء مير ابيك لاوصلت ابوي بالاخرة بلغه اني خذيت بثاره لاوالله ويسل سيفه وهو نازلٍ على ارقبته ويبربزه بالارض ..وخذا بثار ابوه
ويم وصلت العلوم للشيخ سعدون العواجي وولفته البشاير برد كبده وطاب كيفه ونومه وانساح باله وقال هالقصيده :

يا سابقي رد البرا مات راعيـــــه
،،،،،،،،،،،،،،،،،،،،،،،،،،الجيش حزبٍ والرمك موفلاتــــي
ياناس زول اعقاب ماني بناسيــه
،،،،،،،،،،،،،،،،،،،،،،،،،،عقبه فلا تسوى ريال حياتــــــي
لو من غذا جروٍ لقا ماهقا فيــــه
،،،،،،،،،،،،،،،،،،،،،،،،،،كان العرب كلها تسوي سواتـــي
((الورع ورع عقاب لاخاب راجيه
،،،،،،،،،،،،،،،،،،،،،،،،،،حول بهايس ماتناسى وصاتــي))
((كزه لبوه ويذكر ااني موصــيه
،،،،،،،،،،،،،،،،،،،،،،،،،،يعد ما شافت عيونه ثباتـــــــــي))
الخيل تثقل لين تسمع عزاويــــه
،،،،،،،،،،،،،،،،،،،،،،،،،،ومن يوم سمعنه وهن مقفياتــي
لعل ورعٍ مامشى درب أهاليـــــه
،،،،،،،،،،،،،،،،،،،،،،،،،،تشلق عليه جيوبها المحصناتــي

وقال القصيدة الثانية اللي يصف فيها وشلون كانوا احفاده والخطاب كان موجه لعقاب عقب ما خذا احفاده بثار عياله ويوكد ذبحة فريح لهايس القعيط وانه هو اللي بدا:

فاتن ثمان سنين والثار غــــــادي
،،،،،،،،،،،،،،،،،،،،،،،،،،مواكرك ياعقاب عقبانها صغــــار
عضود فرخك ما تجيد الــــهدادي
،،،،،،،،،،،،،،،،،،،،،،،،،،سنه صغير ولا تمكن من الثــــار
واليوم يروي مرهفات الهنـــــادي
،،،،،،،،،،،،،،،،،،،،،،،،،،والخيل من فعله هزايم وعـــــبار
يا عقاب دونك هايس جاك بــــادي
،،،،،،،،،،،،،،،،،،،،،،،،،،ثم انشده ياعقاب كيف الخبر صار
((فرخ العقاب اللي رمى به وكادي
،،،،،،،،،،،،،،،،،،،،،،،،،،خلا شتات الريش شتان وبـــــذار))
((حرٍ قنص حرٍ بثاره وصـــــادي
،،،،،،،،،،،،،،،،،،،،،،،،،،ليث على خيل المعادين كــــــــرار))
الى عثى بمشمرات الجــــــــوادي
،،،،،،،،،،،،،،،،،،،،،،،،،،ياعقاب مثلك لاحمر الدم نثـــــــــار
يقطع صبي ما بثاره ينـــــــــــادي
،،،،،،،،،،،،،،،،،،،،،،،،،،والخوف ما طول قصيرات الاعمار

وهذه كانت سيرة عطرة عن الشيخ سعدون العواجي تخللت بالشجاعة والكرم والشهامة والقوة من مكارم البادية وصورت قصية أبطال وشيوخ نادر بها الجزيرة وصفهم وحلاياهم
الله يرحم الشيخ سعدون العواجي ويرحم الشيوخ عياله اخوات النمشة..
================================================== =========== اتمنى انني مااكون طولت عليكم واتمنى انها تعجبكم

تقبلو تحيات اخوكم...الـgـعفري