[poem=font="MS Sans Serif,4,black,normal,normal" bkcolor="transparent" bkimage="backgrounds/40.gif" border="double,4,crimson" type=0 line=0 align=center use=ex num="0,black"]
يا لله يامدير الهبــــايب والادوار =شانك عسى تصريف شانك لنا خير
يالله ياعالم خفيــات الأســـــرار=يامعتنــي بالخلق والي المقاديــــر
قلته ونوم العين عن جفنها طار =والقلب كنه فوق حامي المجــــامير
جانــا الخبر يالابتي ولّيــة الدار=سكانها الأجناب هم والبقـــاقير
من عقب ما كنا بها مثل الاسوار=نامر وننهي نحمي الجار ونجير
من عقب ماكنا هنيا كما الطار =نقطع بها شر وناصل بها خير
حنا الذي ترجع لنا كل الأشوار=لا صار بالقالات شوار ومشير
حامينها في لابة تسقي الامرار=عدوهم ما يحتسب للمخاسير
لابد ما ناتي لها يوم زوار=باسلاف عجلات تعدى المظاهير
يهوّمن هومات بعيدات وعسار=وكم ذيرن من غافل مابعد ذير
كم فاجن العدوان غرات وجهار=الى انتون كم يسبقن من معايير
ظعاينن حطن ملك بسنجار =وبنن على الخابور زين الدواوير
وتواهلن الزور حصن لهن كار=ومن البطين الى الدهاله معابير
وكتن مع الحاوي وداجن بالامصار=وجابن خفارتهن بفكر وتدبير
وحطن على السلمان طبخات الامطار=وصارت لهن لينه وخضرا مصادير
ومالن على رجم الهيازع وسنّار=وجابن حلال المحمره من ورى النير
وراجن على الشنبل وداسن الأخطار=وهدن بها العاصي بيسر وتيسير
ثم انتحن مع كفة الشط عبار =وهاجن وماجن فوق روس العناقير
واقفن وكالن من شثاثا بالسعار=وحطن ل ملموم المسمى مسامير
واقطعن بنون الخطايا والاقفار =وكم طيرن جول الحبارى المخامير
وخلن فوق الشبك عج الرمك طار=ياحلو هاك اليوم خز المعاشير
اركن على ورد الدجاني لهب نار=وغدو بها الويلان مثل المداوير
شدن وحطن الثمامي بالايسار=وخلن على العدوان مثل المعاصير
سارن بناالزرفات باقبال وادبار=من غوطة الفيحا الى غسلة الدير
نروم من زين المنازل ونختار =ونستارد الخوه بحدب البواتير
لياما نخونا اللي على الدار حضار=وجانا كتاب من زبن المقاصير
ماجد بن عريعر وهو حر الاوكار=يقول وليت داركم يالمناعير
وجيناه مثل السيل طمام الاوعار=لياما غدت عنها البوادي شعاثير
أولاد عم ولابنا قول شبشار =وشيخ لنا عنده جلال وتقدير
أولاد عم وما حذانا لهم جار=حنا عليهم نحمي الجار ونجير
حنا نشب الحرب لاشبت النار =وتوايقت بين الحنايا الغنادير
حنا بني وايل بعيدين الاذكار=الياتناخو بالجموع المشــــاهـــــير
حنـاهل الجمع المسمى الياســار=ومركاضنا يشبع به الذيب والطير
وين انت ياللي تايـه منك الابصار=جيناك حوله من شثاثا وابا القـير
هـج المعـادي مالقينــاه بالــدار=زبن على الحـده وذيـك الشناخـير
قلنـا عليهم صـايرن مثل ماصــار=ذبح الشفـايا واغتنـام الخواويـــر
كســيرة ماقط ذكـرت بالاذكـــار=فيهـا القلايـع مثل روس الخنازيــر
صحنا عليهم صيحة باللقا الحـــار=حتى جبرنـاهم عن الدار تجبـــــير
لولا شفــاتي فيـك يانجد ماأحتار=فكـري ولا كثرت علي التفاكــــير
ولولا شفــاتي فيــك ماجيت مرار=نادى نذيرات الهواجيــس ونديـــــر
وندير حيــلات بالاريـــا وتبصـــار=وارجي من الباري عساها مسافير
دار جـفتنــــا وكــل دار لنــــا دار=ماهي معـافه مـير جوع ومداهــير
قطعـاننــا ترعى زماليــق نــــوار=لياما غدى فـوق الاباهر قناطــير
مـابين مسنــاد ومــا بين محـــدار=يامـا قطعنــا بدربن من مشاويـــر
ياما ركــبنا بالسرى قب الامهــار=وبعيرات الأنضــا كنهن السنانــير
نعتاض عن دار عليها الدهر جـــار=ديد العسل فيها تعيش المفافــير
مثل المسوح اللي ترزم على حوار=دار مريه بالشتــا تسمن الضـــــير
دار لها بالقيــظ غدران وانــــــهار=والتمّـن المجروش ملي الجواخــير
وصلاة ربي عد مابالســـما طــــار =وعداد ماوردن ظمايـا على بيـــر
على الرسول المصطفى سيد الأبرار=نور العباد اللي يشيع التباشير[/poem]