الموضوع: ارجوك جفت ادموعي لاتبكيني هههه
عرض مشاركة واحدة
قديم 10-29-2009, 03:03 PM   #1




 
الصورة الرمزية حصان الرجلية
 
تاريخ التسجيل: Dec 2005
المشاركات: 4,036
معدل تقييم المستوى: 305
حصان الرجلية is on a distinguished road
افتراضي ارجوك جفت ادموعي لاتبكيني هههه
وش جايبكم

يالله حيهم كلهم ، اول شيء ابارك لكم وابارك لنفسي هالموضوع اللي انولد اليوم
وياليت جاه تسقيط ولا ولد علينا لأنه شسمه مدري وشلون جاي بس المهم انه جاء

في الواقع ياجماعة الخير اني كنت طالع اليوم العصر اقضي مشاوير وانا امشي بسيارتي ( احد قايل ان معك مشاية ) المهم وتمسكني ذيك الاشارة وانا واقف اسمع واحد يسولف بس بكلام ملحن والتفت الا واشوف واحد ذكرني بالثمانينات
الحاصل ان الولد ياحبي له مشخص بنت البكار ( بنت البكار لغير الناطقين بالنجدية هي شخصية قديمة او تنسيفه ، المهم انه ينسف الشماغ مثل الجدايل وبدون عقال ) ومشغل اغنية بشير " دخلت سوق الذهب عصرية الأثنين ،، لاعادها الله دخلتن نكدت حالي " خخخخخخخخ ياروحي يابوحمد والحاضرين المشكلة اليوم الأربعاء بس شكله كان يتذكر قبل امس ودي اكمل الاغنية بس اباحية شوي وتجيب لي ولكم مشق ويمكن نستحي ولاعاد نسلم على بعض من الحياء

المهم اني قعدت اتذكر الماضي ولو اني مالحقت الا ع شيء بسيط منه ، وقعدت اتذكر عرابجة الأولين وحركاتهم اللي تحوم التسبد طبعاً بس كنا متقبلينها ذيك الايام كان الواحد يعبر عن الحب عن طريق قزازة السيارة خخخخخخخ كانت هي قلبه النابض مايحتاج تمسك احد ع جنب وتقول فض فض لي ، لان فضايحه كلها ع قزازة السيارة ، يعني تمشي في شارع من الشوارع تلقى كابرس مثل هاللي بالصورة
و كاتب ع القزازة اللي ورى " ارحلي بسكات لاتطري الوداع والله انك في حياتي غلطتي ،،، ابتديتي وانتهيتي بالخداع كل من حولي بكوا من قصتي"
يلعن الحب شو بيزل ياقدعان عاد اكيد جنب البيتين هذي صورة بنت متبرقعة كأنه يقول ترى حبيبتي مثل هذي عشان اذا شافوه الناس يقولون والله ماتنلام يوم تزعل كانت طخما ورحال عن ديرتك رحال

غير كذا ياجماعة انك تقرى حياة هالشخص قراية كاملة ، يعني تعرف متى زهقان وتعرف متى متهاوش مع حبيبته وتعرف متى هو في قمة الرومانسية وكل هذا تشوفه من خلال الكلمات اللي بالقزازة ياحبي لهم اللي بقلوبهم على قزازتهم .

فيه نوع منهم يجيك متقلب عاطفياً يعني يوم تلقى حرف بالقزازة A وجنبه قلب وسهم مشقوق ، فجأة بعد يومين تلقى حرف B وجنبه قلب مشقوق ويخرخر دمامين ( هنا يصيبك الذهول صراحة ) بس كنا ناخذها على مبدى جميل انه بكرى بيكتب باقي الحروف الانقليزية طالما بدى بحرف A و B فـ اكيد انه بكرى بيجيب حرف C مهب اقولكم قبل شوي ان قزازة السيارة توصل اللي بقلب السائق بس من بكرآ تفاجئنا انه طامر الحروف وكاتب حرف T صار الولد مهب على مابنينا انه بيعلمنا الانقليزي قبل ماتوصل للسعودية صار توه طايح في قصة حب جديدة " تحية للقلوب الفندقية خخخخخخخخخ "

نجي للأغاني اللي كانوا يسمعونها طبعاً هي سواليف يعني خذوا مثل مطلع هالاغنية ( مقهور ياصاحبي مقهور ،،، واللي شبكني يخلصني ) طيب دق على شركة الكهرب ، هذي الاغنية طبعاً مايمسعها الا عرابجة فيهم التماس بالعقل طبعاً هالالتماس يكون ناتج عن اكل حبوب الكبتاجون الله لايبلانا

الحاصل ان الحالة كانت بائسة نوعاً ما اول الواحد اذا شرى ددسن غمارة كل عرابجة الحارة يعزمونه ، ترى مهب حب فيه لا لا ، عشان يلبق الددسن عند بابهم اذا جى يتعشى ( عاهات ) وعقب مايتعشى ويغسل يدينه يجيك اول عربجي يمسك راعي الددسن ويحب خشمة تراني حالف ان بكرآ الددسن مايغسله الا انا " رغم السقم اللي كانوا يعيشنونه الا ان كان بينهم مبدأ التعاون والعيش والملح "


كل مافي الموضوع اني كنت متوقع هالفئة اندثرت وتلاشت في ضل وصولونا لـ 2009 ولكن اللي صار اليوم خلاني ادق ريووووس الى عهد الثمانينات البائس

ودي اتكلم عن عربجة البنات أول بس للأسف ماحصل لي الشرف مااعرف عنهم الا انهم كانوا يحبون خالد عبدالرحمن ويلبسون تنانير مشجرة ياليت اللي عندهم خلفية عن ماضيهم البائس ينورونا شوي

حبيت يكون الموضوع خفافي عشان مايجيكم شد عضلي من القراية واطل عليكم من خلاله اشوف من اللي جاه مشق فيكم

وصباح الخير يالقهوة
__________________
حصان الرجلية غير متواجد حالياً   رد مع اقتباس