قصـــــــــه باللهجة الحائلـــــــيه
قصـــــــــه باللهجة الحائلـــــــيه ..
السلام عليكم ورحمه الله وبركاته
صبحكم الله بالخير جميعا
هذي قصه ياطويلين العمر باللهجه الحائليه اتمنى تكون كلماتها مفهومه
هذا يقولون كفانا شر مايقولون
هكالحين بوة مرتن ماتجيب وغدان
وكل ماتصلي تدعي الله انه يجيب له بنيه
وابد تدعي وتدعي
وتجي هكاليوم يمار بطنة يمغصه وهي تركظ يم الحمام (الله يكرمكم)
يوم اتزعت يمار هالي نطق منه
وهي تشهق
وانصفري
ويوم وعت عقب مدتن ماهي هينة واتدنق اتراعي تحته يمار هكالخنفسا الصغيره نويمة
وهي اتحركة بلهون وهي تاعي
وهي تقول يمة يمة جويعانه
وهي تقوم تبي تهج
ويوم جت تبي تطلع وهي تنكس تراعي لهالخنيفسه وهي تعين من الله خير
قالت الحمد لله بس ان الله جابتس لي
يمار هالخنيفسه تحتسي وابد اتفصفص العظام بالحتسي
وهي تاخذه وابد ونسته بالحيل
ايييييييييييييييييي
المهم
المره جحدت على الناس ان عنده بنيتن خنيفسه محد يبي يصدقه
وجت هكاليوم الخنيفسه وهي بالسطح تسدير
يمار حس الخيل الي بالشارع الي تحته
يمار هكالرجل الي يفظخ القلب
طول ورزة وهيبه
وتركظ يم امة قالت يمة اروجي ويدزي منهو هذا؟؟
قالت امه هذا الامير
وهي تسكت الخنيفسه وماقالت شين
اها
يوم جا من باتسر يمار الخنيفسة مولمتن ماء ومسك واطياب من كل ابو لون
ويوم مر الامير من تحت سورهم وهي تقعد ترشق عليه من الماء المطيب
وهو يراعي فوق جهة السطح وهو يتسفه على الريح الي جته
وهي من العوابه يامنه ارشقت عليه قالت
(( احيييييييي وويلي يابردوة احييييييي))
وهو يراعي ويتصنت
وسكت
يوم جا من باتسر نفس هالحزة يمار الخنيفسة مولمتن نفس الي ولمتة امس الماء المطيب
ويمر الامير وتنكس ترشق عليه ونفس عمله امس
ومن باتسر نفس العمل
الوكاد انه حول الاسبوع وهذا عمله بوة
الرجل تسفه
قال هذي وشلونة الي هذا لون ريح ماه الي اتسبح منوه اجل ريحة الصدزي وشلون ؟؟
وويلي تسيف اخليه
وهو يدرعم يم بيت الخنيفسة
ويطق الباب
وتجي الام وتفتح الباب
وويلي ياهلا ياهلا تعد تعد
قال اسمعي يامره
انا مستعجل مار ترينن جاين ابي بنتتس ابي اعرسة
وهي تسبط قالت وشو بنتي
من يقول ان عندي بنت
قال قردتتس تقولين انه معرسة ترينن اذبح رجله
قالت من يقولوة انا ماعندي ظنى
يمار الخنيفسه تسمع فوق
وهي تجي تصوت
يمة يمة منهو الي جاء؟؟
قال ها ها ماعندتس بنات
اسمعي ترينن باتسر عرسنا
وابد مالتس الا الي يرظيتس
وان ما زوجتينن تري والله لا امصع رقبتتس
وهو يدزفي
وتقعد الام تبتسي
وتجيه الخنيفسه
قالت يايمة ماعليتس زوجينن ياوة
قالت هو ذابحن ذابحن
ان مازوجتوة مازوجتوة وان زوجتوة من زوجتوة خنفساء؟؟
ياغميظتي بس
قالت يايمة ماعليتس اعملي الي اقولتس عليه
الوكاد الام اقعدت تولم حدى الدور الي بالبيت للعرس
وبس تبتسي
وخنيفسة زايغتن من الفرحه
مارجن ذهنه ماهي يم امة
يوم جا من ليلة العرس وتجي الميمة وتحط خنيفسة بالسرير
وتربطة بطرف الثوب الي مجيوبن لهن للعروس من الامير
وهي تطلع وتصك الباب
جا الامير على المغرب
وهالناس متهولين مايخبرون ان عند هالمره بنية
من يبي ياخذ هذا الامير؟؟
المهم تعشو الناس وعرضو ويدخل الامير بالدار
ويصك الباب
ويتشوف
ويراعي
يمار مامن والي
بس هالريح هي نفسه ريح هكالطيب الي يعاطي هكالايام
المهم هكالوقت كانن العرايس يلبدن عن المعرس
ويخلنهم ينفلون الدار اليما يلقونهن
الوكاد ان الامير ضحك وقعد يدور
ونفل الدار بخش بخش
ومامن احد
يوم جا يطلع
تجي خنيفسة تقول
((( عجاز عن بنت عموة مابوة خير )))
ويلتفت وينكس يدور
ويدور
ويدور
ويوم جا يطلع وتقولة
((( عجاز عن بنت عموة مابوة خير )))
وينكس يدور
ويدور
اليما قرب الصبح وهو يدروخ وينام
يوووووووووم اصبحو
يقوم الامير
وينكس ويدور
ويدور
ويدور
يمار مامن والي
ويوم جا يطلع يمار نفس حتسي الخنيفسة
وينكس
المهم انة قعد على هالحال الين الظهر
وهو تندبل تسبدة وهو يطلع
وتجي الام تركض يم خنيفسة
قالت هاه ياوليدي
قالت ماعليتس يايمة
طيبنن وانتي ماعليتس
وقعدت اتطيب الدار
وهو ينكس الامير العصر
ويدخل الدار
ويخانق ويحتسي
يمار مامن رد
ويدور ويدور
ويوم عجز جا يبي يطلع
وخنيفسة تقول
((( عجاز عن بنت عموة مابوة خير )))
وينكس
الوكاد علشان مااطول عليكم قعد على هالحال يجي لوة ثلاث ايام
يوم ربع
قال للام اسمعي ولمي بنتتس وقشه وتريننا نبي ننكس يم قصري
هو بزعموة ان خنيفسة متغيبة بمحل بالدار مايقوى ينخشوة انوة بيتهم
بس بالقصر هو عارفوة بخش بخش
المهم
جابو خنيفسة للقصر
وحطتة امه بالدار
وطيبة الدار وطلعت
وجا الامير
قال
هها هالحين التس مهرب مطلعتس مطلعتس
وقعد يدورة
يمار ماش ماهي بوة
اندبلت تسبدوة
يوم جا يبي يطلع وتقولوة (( عجاز عن بنت عموة مابوة خير )))
وينكس
قعد على هالحال يجي عشر ايام
عقبين اندبلت تسبده
قال لو هي ابرة تسان لقيته
وتجيه هكالفكره
وهو يجي ويطلع كل الي بالقصر
الخدم والخدمات
وهو يجيب سطل طحين وسطل ماء
ويحطهن بالدار عند خنيفسة
قال اسمعي يامره
ابيتس اتعجنين هالطحين وتعملين لي صبيب ( رهاف)
وابي مايجي المغرب الا وهو قاظي
ولو ماعملتيه والله اني لا أسعر بهالقصر كله وانتي بوة
قالت (( ابشر ))
المهم طلع الامير
وهي تجي خنيفسة يمار ماهمه
وترقى بسطل الماء وتغطس وعقبين تطلع واتدربا بالطحين
وتنكس يم الماء واتدربا على الطحين
وهاللون
يمار هكالبريعيصي مسكون واقفن يراعي
وهو لوة بوة دلقمة برقبتوة
يوم شاف عمل الخنيفسة وهو يبخ يظحك
وهي تنطق الدلقمه
وهو يحتسي عقب ماهو مايقوى
ويجي يقول عاد جزانن لتس يا هالخنيفسة انتس نكستي لي حسي ابقلبتس بنت
وهو ينفث عليه وهو يقلبه بنت ((تدرون انة سالفه من نسج الخيال يعني لاتصدقون فلذلك جرى التنبيه ))
بس وشو
تزغت
شعر وطول وبياض وعيون وعنق وافيم وجسم وكله ترهج
وهي تقوم واتعجن
واترهف
ويوم جا الامير ويدخل بالدار
ويوم راعى يمار هكالبناوة وهكالقدر الي مليان صبيب مشرب
ويركظ يم البنت وينسى الصبيب
يوم اصبح
قال صوتو لامة ابيه
ويروحون يصوتون للأم
قالت بس اكيد انة دري انه خنفسى
ياويلي يبي يذبحن
ياقردي
ياغميظتي
وتبتسي وتصيح
وبالليالله شالوة وودوها يم الامير
وم دخلت ويتزبل عليه الامير ويحب راسه ويحط ابيده له حفنه فلوس
وقال ادخلي سلمي على بنتتس
وهي تقل مسفهه
يوم فتحت الباب وتدخل وتراعي لهالبنت وهي تقعد اتنفل اتدور خنيفسه
وتنفل وتنفل
وهالبنت تظحك
قالت يمة انا خنيفسه
وتراعي الام وتراعي
قالت تعقبين
قالت والله انا خنيفسه يا يمة
قالت وشلون؟؟ اخبرتس ؟؟
قالت له السالفه
وهي تخمه
وتحمد ربه ان الله عوضه
وابد عاشو عيشتن ترضاه لروحك
وانتهت القصه
__________________
|