أول الحب يوما شفت بنتا صغيرة

الليالي بها عميا وفيها بصيرة = أغتنمها مطولك بأول العمر ساير

وكم عقيدا يعزل في ضحى الكون خيرة = يوم لحق الطلب صارت عليه الكساير

ياوجودي وجود اللي تصوب بعيرة = قام ينخى ربوعه والفشق فيه ثاير

ذبحوا عيال عمه هم خيار العشيرة = ثم خلي منيعا في يدين النحاير

عند قوما خساس ولا لهم سلم جيرة = يقطعون الوجيه وياخذون القصاير

اسحب الرجل وامشي بالدروب الخطيرة = والقدر مايعرفه كود رب السراير

البلاوي بلتني والرحى مستديرة = والجهد عقب طول العزم فاتر وخاير

وأول الحب يوما شفت بنتا صغيرة = في وسط سوق تدمر لا سقته النثاير

بنت شاوي زرع بضمير حنطة وميرة = جوا يبيعون زيت ويشترون الزقاير

اسمعه يوم ناداها هنا ياسميرة = وجت تلفت تقل ظبيا من الرمي ذاير

لابسه بنطلون وفي يديها سويرة = والقميص المورد فاتحا للزراير

وقفت و غمزت لي بالعيون النظيرة = وضحكت لي بوجها كنه البدر داير

قالت انتا سعودي باي وايات ديرة = يمكن انا نعرفكم لا ذكرت العشاير

قلت انا جعفري وربوعنا بالجزيرة = اه ياويل قلبي ليت ربعي حظاير

والله اني عليكم غير اجر الجريرة = تحتميني هل الجدعا وما كان صاير

لا تعرف النفود ولاتعرف الحفيرة = ولا تعرف الكتيب ولا تعرف العماير

قال ابوها مشينا قلت ياعم غيره = لا تروحون عني معكم القلب طاير

يوم قفوا وانا واقف وبالقلب حيرة = ألعن الحظ الاقشر والحياة العزاير

ليت من حاش مثله بالحياة القصيرة = يتهنى معاها لو تدور الدواير

كل من سمي محيسن حياته جهيرة = يسهر الليل وعيونه تهل العباير





الشاعر / عبدالمحسن الجلوي