غلطان من يقول إن الشعر النسائي لايرقى إلى مستوى شعر الرجال

[align=center]الشعر النسائي


شاعرة البقوم تقول:

ألا يايدي ماارضى عليك خلاف ..... يجي عيش والا جعلهم مايذوقونه
دمرت الذهب ماعاد لأهل الهوى ينشاف ..... وأنا مالبسته غير أباهم يشوفونه

فتاة الوشم :

والله ان قلبي عليه الدم فاير .... في سعة مير الرخوم يطفشونه
يوم أشوف اللاش مذهوب الحضاير .... طول عمره مايحول الليل دونه
بنت شوفي يوم شوقك جاك ناير .... شاردٍ مذعور طايرتن عيونه
يوم شاف الجيش رابط بالذخاير .... خايفٍ يم الحرايب يدفعونه
جعل رجل اللاش تربط بالجباير .... خبروا فيه الحكومة يدبونه
لااخذ الراتب رجع للبيت ناير .... لو تقفوه الخضر مايلحقونه

سعدة بنت خالد الرمال :

نطيت رجمٍ بغربي راف ..... يلعبي الهيف طايفها
قلبي كما دلة الهرجاف ..... لاصار أبو زبن حايفها
العيب ماهو ببدع القاف ..... العيبة يابنت نعرفها
العيب في قضبة الملقاف .... لاجا عشيره يدغفها

فلجة الفهدية :

حافظ على شبتك لاتشب .... لاياخذونه هل الكاري
علي أنا هيلها والحب ..... لو كل حبة بديناري
ترى الولد لابغى ينصب ..... يتعب على شبة الناري
والا العفن مالقوله طب .... لو درت في كل الأقطاري
تلقاه لين الضحا منكب .... والمرجلة مالها طاري

وتقول الفهدية :

الطيب طيبه يجيك شمام .... والمدح يوريك معروفه
العفن لو تمدحه ماقام .... لو يسهج الطيب مايشوفه
يرنق ويصير له سنام .... مابين علباه وكتوفه

وتقول أيضاً:

ياهيه ياعيال بالطرقان ........ من هس كثرت عذاريبه
واللي مايفسر عن الذرعان ....... ماتدري الناس عن طيبه

وتقول فلجة الفهدية بوطنها :

عسى الحيا يم أهل جبة ..... اللي على الكود صباره
ديرة هل الكيف والشبة ..... من جيت يعجبك مسياره
سلمه على السلم يهزبه ..... ماحطو الهيل بتجاره
هني من نوبةٍ طبه ...... قبل يجي العمر مسفاره

وفتاة الوشم تقول في الوطن :

شباب يااللي عليك السود منشورة ..... ارفع مقام الرجولة لاتخربها
ترى الشجاعة لجيشٍ صف طابورة ..... نقالة البندقية مع مقاضبها
جيشٍ بهم دارهم تفخر ومنصورة ...... دونه عمارٍ على الأخطار يجلبها
عاشو حماة الوطن في عهد اخو نورة ..... درع الجزيرة لياشبت حرايبها

قالت جزعا العجمية في السيارات:

راكبٍ من فوق مايقطع الفرجه شفر .... وارد السبعين والا بعد زيّد وراه
يسرع الممشا ليامنا نوينا بالسفر ..... ياشبيه الريح ويودي الطارش مداه
كن ونداقه مع القاع لامنه استمر..... وندقة سيلٍ حقوقٍ صب مـاه
غاية المطلوب ممتاز مأمون الخطر ..... مايبرد للرديتر إلى منه عطاه

وتقول بخوت المريه :

حن قلبي حنة الماك مع طلعة نفود .... عشقو له بالدبل والحمولة زايدة
وزوع قلبي زوع طيرٍ على الجول مهدود..... يطرد مقّفي وطرد المقفي كايدة
مااهبلك يااللي تبي العصر الاول لك يعود ..... مايعيده كود محيي العظام البايدة

وتقول أيضاً:

أنا حن قلبي حنة الماك ياابن عقير ..... متى ماعطا تغريز ودريوله قصاه
عطاه الثنين ورك في نقضته للقير ..... ثم زكه بواحد لين زاع الرديتر ماه

وتقول :

حن قلبي حن ماكٍ على سمر العجل ..... عشق السواق والدرب ممسوكٍ وراه
ان طلع مع طلعةٍ عشقو له بالدبل ..... وان تسهل ريحه لين ياصل منتهاه

وقالت أيضاً:

عيدوبي بالخلا والفريق معيدين ..... وكل عذرا نقشت بالخضاب كفوفها
ول عودٍ لاش رحمة ولا قلبٍ يلين ..... عل ذودك في نحر قوم وانت تشوفها
مايقرب دارهم كود صنع الذاهبين ..... نوع بنزٍ عزمها من صفاة بلوفها

وضحى المصّبح:

انحت رحاك وخل عنك القهاوي ..... شبّابها بأيسر سنامٍ دفنّاه
اللي لدقة نجرها مايراوي ...... عشان عكفان الشوارب تنّصاه
اللي لياجو مضرمينٍ مقاوي ...... يلقونها قبل يجونه مسـّواه
ماهو على كيف النشاما غلاوي ..... يشريه لو هو بالثمن زاد مشراه
عساه بالجنة عشير الفداوي ..... عرضه وطوله كل ماحل طرياه

وتقول فلجة:

راكب اللي لاشرود ولاعزوم ..... عليه اللي لاركبها ماينام
خشمها مابه نفس غير الرقوم ..... زاهياتٍ مثل دقات الوشام
حلو زوله مع رهاريه الحزوم ..... مخها زيتٍ ولاخلق به عضام

وتقول أيضاً:

راكب اللي جاز له زين ممشاها .... ماركبها واحدٍ قبل راعيّه
يوم دق السلف والنار ياطاها ..... يوم شد القير رزت بواجيّه
مايفيض الزيت من ضيق مجراها..... جديدةٍ توها من السوق مشريّه

ولها أيضاً:

راكب اللي كنها لون السفينة .....يوم حط شراعها الغربي حداها
هافٍ أدهم من حفيزه جايبينه ..... شلع القرطاس وزود مشتراها
عابيٍ له زيتها مع بانزينه ..... والصنايع والسبيرات بقفاها
ماخرب من عدته عنده ضمينه..... آخذٍ رقمه وعنده ماكفاها
يوم دق السلف والقير بيمينه ..... يوم ثارت عند أبو سالم عشاها

وتقول :

دزه مع القير والحذاف ..... كنه تقارش صواميله
خرب الدبل والتروس خلاف ..... وخرب رمن بل وكويله
لاجا مع طلعة الميهاف ...... فره ولقّا الهوى ذيله
[/align]