مواطن يبعث برقيه للملك

بو متعب ( يا فزعتي )
الله يطول عمرك ..

العلم سلامتك:
ياطويل العمر الله سبحانه كتب علينا وانولدنا (سعوديين)، ومن يوم انولدنا والشيبان الله يرحم من مات ويطول عمر من بقي في طاعته، يخرعونا من (الحكومة) وصرنا إذاأجتمعنا على الوجبة نحمد الله اللي أطعمنا ثم ندعي للملك ونترحم على والدكم غفر الله ذنبه.

سبحان الله أرسل نبينا محمد صلى الله عليه وسلم ولحكمة، ما جعل له (أبناء) يعيشون !!

وما عرفت الحكمة إلا بعد مازادوا ما شاء الله الأسرة الكريمة!!
ونتوقع بعد نصف قرن أن كل واحد من الشعب بيصير له أمير لحاله!!!
وهذا من فضل الله ، والا كان ابتلشنا في الميزانية وما لقينا لصرفها طريق.
ياطويل العمر ، ما علينا ، المهم الله يحفظك مادمتوا في خير ترانا بخير .
قبل أمس أنسرقت سيارتي ، وفي الحقيقه اللي سرقها هو (الخسران) ، بلغت الشرطة وأخذت صورة من أصل البلاغ وقالوا : إذا لقيتها علمنا!!
وأنا والله ياطويل العمر (مستور الحال) بس ماأقدر أشتري سيارة ثانيه،
وإن لقيت (رخيصة) على قد الحال ، ماأقدر أنقلها من كثر (القسائم)
وكلها تحميل ركاب (طلب الرزق الحلال) ماعندي وظيفه!
المهم يابو متعب:
قلت لواحد من عيال عيالكم أشتكي عليه إرتفاع سعر (البقدونس) !!
قال : وشهو ذا!!؟
تصدق ياطويل العمر مايعرفه!!
الأسعار انا افدى خشمك (نار) ماعلينا من الغازيات لأننا ماحنا لاقين نأكل ! والجائع وش بيهضم (الحمد لله)!
لكن ترى ماعاد أنتحمل ، الغاز بـ15 وفي مصر بـ 4جنيه!
المعلبات كل يوم تزيد ولا من رقيب
الرز صاير (كافيار)!
ابو متعب (الله يكرمك) الزفت آخر رواسب التكرير واللي ماأحد يشتريه، وين يودونه !؟ وشوارعنا كلها حفر!!
وبيني وبينك طال عمرك (ارامكو) تراها مدت جسر جوي لأمريكا يوم جاء عندهم فيضان !
وفي (جده) مامدوا ولا شيء!!
وترى صدر أمر
نبني للأردن 70 ألف وحده سكنيه ثانيه!!!
ونعطي لبنان مليار ونص دولار!!!
ونرسل لمصر المعونه السنويه!!!
وفي المغرب الكهرباء بلاش !!
على حساب السعوديه.
وقبل فترة (قسم بالله) واحد سعودي طعن (بنقالي) عيا لايعطيه حليب (سلف) لبنته!!
ابو متعب : لو الدولة خصصت أرض كبيرة في كل منطقة ومدينة للمواطن داخل النطاق العمراني (ما هو بعيد زي المنح)!! وأعطي المواطن تخفيض خاص لمواد البناء
وقرض ميسر يبني بيت لعياله ، ترى يوفر حق الإيجار لعياله و (ينطم)!
والا فيه حل ثاني :
أسمحوا للمواطن (يهاجر) وخاصة المتقاعدين ، يفكونا أذاهم ويخففون (الزحمة) ورواتبهم بتكفيهم في مصر او الشام ... (الله لايردهم)!!
واسمحوا للشباب يتزوجون من (الخارج) أسوة بعيالكم الله يطول عمرك ، (الأجنبيه) رخيصة وماتستهلك مثل (السعوديه) عزايم ومصاريف، وقلة حياء.
ترى المواطنين (ذوي الدخل المحدود) طلع لهم (ريش) وصاروا يسولفون في (المجالس) ماأدري يمكن (أيتام) ماخوفوهم اهاليهم من اول!!
ياطويل العمر ترى (دول الخليج) قاعدة تعطي شعوبها بالهبل ، ماهوب كرم ! بس يبغون يقهرون شعبك ، وبدري عليهم!
أعذرني طال عمرك طولت عليك وودي أروح أدور سيارتي وابلغ المرور!!!.

رجـاء خـاص
وصله يمكن يوصل!!!