الموآسـآه

الموآسـآه

لا ياهوى القلـب المعّنـا ورجـواه = لاتتركيـن احـداً يحّـس بوجعنـا

ماظني احـداً يحمـل اللـي حملنـاه = حنـا خلقنـا والمعـانـاه معـنـا

الهـم بادرنـا وحـنـا كتمـنـاه = والوقـت شتتنـا بعـد ماجمعـنـا

والصبـر حنـا فالغـرام ابتدعنـاه = لكـن حسافـه صبرنـا مانفعـنـا

مـا مـر يـوم ببعدنـا مابكينـاه = ومن ضيقنا كن الوطـن ماوسعنـا

لامن ذكرنا وقتنـا اللـي قضينـاه = صحنا بعالي الصوت محـدن سمعنـا

للوصل دربٍ مـن عنانـا مشينـاه = وفآخره لـدروب المفـارق رجعنـا

يومن جزعنـا مـن حمول المعانـاه = محدن درى في حالنـا لـو جزعنـا

ارواحنـا تلقـى بعـض فالمناجـاه = نبحر وننسى همنا اللي تبعنا

مـا واحـداً منـا تنّكـر لمـبـداه = في إحساسنا ماقد شرينا و بعنا

لو غيرنا زلّـت بـه اقدامـه وتـاه = واصبح يعيـش بدنيتـه دون معنـى

حنا عرفنا الوقـت فأولـه واتـلاه = لوينخدع به غيرنا .. مـا انخدعنـا

ويانـور عينـي بادلينـي المواسـاه = يكفـي تـرا ممـا دهانـا شبعنـا

ارجوك كفي دمعتك .. واكتمي الآآه = لاتتركيـن احـداً يحـس بوجعنـا