سعدون العواجي وأبناءه الجزء الرابع

يا علي وين اللي رعينا بهم هيــــت
،،،،،،،،،،،،،،،،،،،،،،،،،،حال اللحد من دونهم والظلامــــــي
البارحة ياشمعة الرب ونيــــــــــــت
،،،،،،،،،،،،،،،،،،،،،،،،،،ونة صويب ومكسره بالعظامــــــي
أوما الشجر وأنا بعد مثله أوميــــت
،،،،،،،،،،،،،،،،،،،،،،،،،،أوماي صقارٍ لطيره وحامــــــــــــي
طير ليا جا الصيد يشبع هل البيــــت
،،،،،،،،،،،،،،،،،،،،،،،،،،جته هبوبٍ مع جراد تهامــــــــــــي
عز الله اني تو يا علي ذليــــــــــــت
،،،،،،،،،،،،،،،،،،،،،،،،،،تبينت وانا على الناس كامـــــــــــي
وعز الله اني مع شفا البير هفيـــــت
،،،،،،،،،،،،،،،،،،،،،،،،،،هفة قفي من عجوز المقامـــــــــــي
واليوم من باقي حياتي تبريــــــــــت
،،،،،،،،،،،،،،،،،،،،،،،،،،عقب الشيوخ معدلين الجهامــــــــي
و يا علي عفت الحي من كثر ماريـت
،،،،،،،،،،،،،،،،،،،،،،،،،،وجريت للونات والقلب دامـــــــــــي
وعذبت قلبي في كثير التناهيــــــــت
،،،،،،،،،،،،،،،،،،،،،،،،،،والعين عيت من بلاها تنامـــــــــــي
راح العقاب الصيرمي شايع الصيـت
،،،،،،،،،،،،،،،،،،،،،،،،،،يا علي من عقبه تراعد اعظامـــــي

وهذه القصيدة بعد من ضمن القصايد اللي رثا بهن الشيخ سعدون ابنه عقاب عقب ما مات :

بيبان قلبي والضماير عونّـــــــــــي
،،،،،،،،،،،،،،،،،،،،،،،،،،إعواي مع ماضي مع سبيب الربابه
أعوي عوا اللي يوم يقنب يونـــــي
،،،،،،،،،،،،،،،،،،،،،،،،،،ذيبٍ تعاواله ضواري بغابــــــــــــه
في راس مرفوع الحجا يقنبنـــــــي
،،،،،،،،،،،،،،،،،،،،،،،،،،تجاذبن الصوت رمل الذيابـــــــــــه
أنا عويت ومثلهن قمت أونـــــــــي
،،،،،،،،،،،،،،،،،،،،،،،،،،عزي لمن عكف الشوارب ذهابـــــه
زمل المحامل بالمهامه غدنـــــــــي
،،،،،،،،،،،،،،،،،،،،،،،،،،وأنا بعد من عرض جملة احسابـــه
قصيتهن حيث انهن حودرنـــــــــي
،،،،،،،،،،،،،،،،،،،،،،،،،،مع جال مايرجع ذهيبٍ غدابـــــــــه
لا والله ليثها غاب عنــــــــــــــــــي
،،،،،،،،،،،،،،،،،،،،،،،،،،ماعاد يرجع ليثها من غيابـــــــــــه
الخوف عقب العز حبله مكنـــــــــي
،،،،،،،،،،،،،،،،،،،،،،،،،،وتحطمت عقب العقاب المهابــــــــه
أيامها وسنينها خسرنــــــــــــــــي
،،،،،،،،،،،،،،،،،،،،،،،،،،ليثٍ يجندل مقحمين الحرابـــــــــــه
صوته ذعار مشمرات تعنـــــــــــي
،،،،،،،،،،،،،،،،،،،،،،،،،،درع المتلي والصوافن تهابــــــــــه
سيفه بهامات العدا مايونـــــــــــــي
،،،،،،،،،،،،،،،،،،،،،،،،،،إن جا نهارٍ طال وأظلم ضبابـــــــــه
الموت سحبه هشمن وارعدنـــــــي
،،،،،،،،،،،،،،،،،،،،،،،،،،وارزم خياله يوم رودم سحابــــــــه
رجف الحوافر بالفوارس يرنــــــــي
،،،،،،،،،،،،،،،،،،،،،،،،،،والسيف يصرخ بالجماجم اذبابــــــه
واليا برز له فارسٍ مايثنـــــــــــــــي
،،،،،،،،،،،،،،،،،،،،،،،،،،صاحن عليه ملويات العصابـــــــــــه
يشهد على ماقلت ريع المغنــــــــــي
،،،،،،،،،،،،،،،،،،،،،،،،،،وتشهد على قولي شوامخ اهضابــه
وتشهد ابواعه والقرايا يشهدنــــــي
،،،،،،،،،،،،،،،،،،،،،،،،،،ورمان يشهد والعماير وطابـــــــــــه
يرمس على موت الحمر ما يكنــــــي
،،،،،،،،،،،،،،،،،،،،،،،،،،حبس بحومات الوغي يلتجابـــــــــــه
من عقب ماني دالهن مرجهنــــــــــي
،،،،،،،،،،،،،،،،،،،،،،،،،،البين يامضي قضعني ابنابــــــــــــــه
غزو الندامه سرد خيله وطنـــــــــــي
،،،،،،،،،،،،،،،،،،،،،،،،،،ركز بلاه وجاحني في صوابــــــــــــه
العام نحري مطربينه يغنــــــــــــــــي
،،،،،،،،،،،،،،،،،،،،،،،،،،واليوم عيدان الزوابع هبابــــــــــــــه
عقاب خذيته المقادير منـــــــــــــــــي
،،،،،،،،،،،،،،،،،،،،،،،،،،لو صحت ما يرجع علينا جنابـــــــــــه
البيض تنعى والعشاير تحنــــــــــــــي
،،،،،،،،،،،،،،،،،،،،،،،،،،عليك ياسبعٍ عرينك بغابـــــــــــــــــــه


وطبعا عيال عقاب وحجاب كانوا بهذه الفترة صغار وغير قادرين على أخذ الثأر ولم يبقى لسعدون غيرهم فأخذ يدربهم على الفروسيه ويحثهم على أخذ ثأر عياله وقال لهم قصيدة وأن يردو عليه بقصيدة ، واذا اعجبته القصيدة يعطيهم المهرة بنت فرس عقاب فلحا ...

وقال سعدون العواجي هذه القصيدة يشكي فيها لاحفاده عيال عقاب وحجاب يبيهم يتقاضون في ثأر عياله من شمر وهايس القعيط :

الصدر ضاق وضاقت الارض بـيه
،،،،،،،،،،،،،،،،،،،،،،،،،،والهم من بين الصناديق لاجـــــي
من العيشة آكل حار ماهي هنيـــه
،،،،،،،،،،،،،،،،،،،،،،،،،،والدمع يسكب من عيوني بجاجي
على الشيوخ مدلهين الرعيــــــــه
،،،،،،،،،،،،،،،،،،،،،،،،،،ترعى هيت عن دربها ماتعاجــــي
مرحوم ياللي ما يخلي خويــــــــه
،،،،،،،،،،،،،،،،،،،،،،،،،،يلكد على الموت الحمر مايجاجـي
رجواي لابن عقاب ثامن ضحيـــه
،،،،،،،،،،،،،،،،،،،،،،،،،،الصبر قل وفات وقت المارجــــي
أرجيه رجوة غارسين الوديــــــه
،،،،،،،،،،،،،،،،،،،،،،،،،،ماخاب غراس يدور النتاجــــــــي
وصيتي ما هي عليكم خفيــــــــــه
،،،،،،،،،،،،،،،،،،،،،،،،،،تنخاك يابن حجاب سفر الحجاجـي
لكم على هايس مطالب دعيــــــــه
،،،،،،،،،،،،،،،،،،،،،،،،،،متبينه ياعيال ماهي مناجــــــــــي
صبرٍ صبرته يخلف الله عليـــــــــه
،،،،،،،،،،،،،،،،،،،،،،،،،،عقب الزلالي صار شربي هماجــي
أما طلعتوا طلعة الصيرميـــــــــــه
،،،،،،،،،،،،،،،،،،،،،،،،،،عندي مثل حسبة عيال النعاجــــي

فرد عليه فريح بن عقاب العواجي :

يا جد يا زين الجواد الرديـــــــــه
،،،،،،،،،،،،،،،،،،،،،،،،،،الى انذعر راعي الجواد الرواجي
انا هوايه فوق بنت العبيـــــــــــه
،،،،،،،،،،،،،،،،،،،،،،،،،،واحرفه قدام جمع العواجــــــــي
ومصقلٍ حده سهوم المنيـــــــــه
،،،،،،،،،،،،،،،،،،،،،،،،،،عليه وصف من حسام الخفاجــي
أبا اذبح الفارس لزومٍ عليـــــــــه
،،،،،،،،،،،،،،،،،،،،،،،،،،والا على قبري يثور العجاجـــــي
اما دعيت الرمح مثل الحنيــــــــه
،،،،،،،،،،،،،،،،،،،،،،،،،،مع الجعر حطوا عشابه بصاجــي
ثار لبوي عقاب ذيب السريــــــــه
،،،،،،،،،،،،،،،،،،،،،،،،،،يودع جياد الخيل سرجه مراجـي
ان جا نهارٍ فيه شل الدميــــــــــه
،،،،،،،،،،،،،،،،،،،،،،،،،،وغدا لهن فوق الطريح ارتواجي
يلكد عليهم والعزايم قويـــــــــــه
،،،،،،،،،،،،،،،،،،،،،،،،،،ليث يعقب للسبايا انزعاجـــــــــي
لو عرضت لي بنت حامي الونيـه
،،،،،،،،،،،،،،،،،،،،،،،،،،قبل القضا يحرم علي الزواجـــي

ورد عليه جارالله بن حجاب العواجي :

ياجد قلبي صار مثل الشويـــــه
،،،،،،،،،،،،،،،،،،،،،،،،،،والا بنارٍ باللهب له سجاجــــــي
هواي والله مهرة معنقيــــــــــه
،،،،،،،،،،،،،،،،،،،،،،،،،،مشمر بنت الحصان الرواجــــي
الكد على الصابور في كل هيــه
،،،،،،،،،،،،،،،،،،،،،،،،،،واطلق عقال الذود والليل داجي
والحق عليهم غارة جعفريــــــه
،،،،،،،،،،،،،،،،،،،،،،،،،،حتى يطير غبارها والعجاجــــي
ثارٍ لبوي افعل بليا وصيـــــــــه
،،،،،،،،،،،،،،،،،،،،،،،،،،يلعن غلامٍ شاف خصمه وماجيِ
لا واهني من طارد الزوبعيــــــه
،،،،،،،،،،،،،،،،،،،،،،،،،،قبل وديع الروح ياجد ياجـــــي
لابد من جرفٍ يدهدم عليــــــــه
،،،،،،،،،،،،،،،،،،،،،،،،،،ولاينفعن كثر النعي واللجاجــي

وطبعا قصيدة فريح ولد عقاب أعجبت جده الشيخ / سعدون العواجي وهو يعطيه الفرس اللي من عقب فلحا فرس عقاب ويرسل قصيدة لشمر :

يا ليت منهو جذ فلحا ثنيـــــــــه
،،،،،،،،،،،،،،،،،،،،،،،،،،والا رباع مسودسه بالمساميــر
أبي الى ماقيل ريعت رعيــــــــه
،،،،،،،،،،،،،،،،،،،،،،،،،،وتوايقن مع الحني الغناديـــــــر
انطح عليها سربةٍ زوبعيـــــــــه
،،،،،،،،،،،،،،،،،،،،،،،،،،يجهر لميع سيوفها والمشاهيــر
متقلدٍ سيفٍ سواة الحنيــــــــــــه
،،،،،،،،،،،،،،،،،،،،،،،،،،أدور ابويه عند روس الخواويـر
إن كان ما لينت بالحبل ليــــــــــه
،،،،،،،،،،،،،،،،،،،،،،،،،،ماني عشير اللي نهوده مزابيـــر
لابد من يومٍ يزرفل كميـــــــــــــه
،،،،،،،،،،،،،،،،،،،،،،،،،،وكلٍ يحسب مربحه والمخاسيـــر
ثارٍ لبوي عقاب فرضٍ عليـــــــــه
،،،،،،،،،،،،،،،،،،،،،،،،،،عليه وصاني زبون المقاصيــــــر
سعدون جدي هو خلف والديـــــه
،،،،،،،،،،،،،،،،،،،،،،،،،،شيخ الجهامه والسلف والمظاهير
دينٍ على هايس زبون الونيـــــــه
،،،،،،،،،،،،،،،،،،،،،،،،،،يجيبه المعبود والي المقاديــــــــر
وان ما نطحت الخيل عيبٍ عليــــه
،،،،،،،،،،،،،،،،،،،،،،،،،،ان وردوهن عند اثامي الخنازيـــر
عيبٍ على العزوة الوايليــــــــــــه
،،،،،،،،،،،،،،،،،،،،،،،،،،واحرم من الفنجال وسط الدواويـر

اخوكم...الـgـعفري

[align=center]تسلم أخوي الجعفري
الله يعطيك العافية
على هذه السيرة لأبطال عنزه
كل الشكر لك

تقبل تحياتي

[/align]

الله يرحمهم جميع

وجزاك الله خير


..............

الـgـعفري

لاهنت عالنبذه الوافيه

عن الشيخ سعدون العواجي

وأبناءه الفرسان عقاب و حجاب

رحمهم الله ..


تقبل تحياتي

فارس عنزة

[align=center]تسلم يدينك أخوي على هانقل

والله يعطيك العافيه عساك على القوه

تحياتي لك ::::[/align]