غلا البنت عند أبوهاااااااا

جبنا لكم سالفه وقصيده عساها تعجبكم ان شاء الله

هالشاعر من شعراء السرمن أهل بلدة جفن توفي عام 1356 (عاد ما ني قايله اسمه إلا في وسط القصة )

<<<<<<<< مسويه أسلوب تشويق

هالشاعر يوم كان شباب كان يشتغل في النخيل وبعد ما كبر صار يشتغل في البناء والطين هذا الشاعر عاش في

منطقة السر وتزوج في أول شبابه وجاه ولد ولا قعد عنده طير مثل هالعيال اللي يطيرون راح واستقر في

المنطقة الشرقية , وجلس هالرجال فتره ما عنده أحد ولا عنده حرمه ولا هاك الحرمة الصالحة الدينه اللي

متوفي عنها رجلها تقدم لها وخذها وهو على كبر ويوم خذها ولاها حرمة ذربه وفيها دين وضفره بالحيل وبعد

فتره رزقه الله هاك البنية من هالمره . وبدت البنية تكبر ودائماَ البنت لها حنان خاص من أبوها والبنت دائماَ

الطف من الولد المهم كبرت البنت , والحاصل يالربع أن هالرجال في هالبيت عنده هالمره مدللته وماشاء الله

عليها ضفره وسنعه تسوي قرصان وجريش هالجريش اللي ما شاء الله تقول كأنه دماغ جربوع ( عاد من فيكم

شاف دماغ الجربوع ) :pهذولي الحريم الضفرات اللي يطبخن قبل عاد وين تلقونهم الحين ( ما عاد فيه إلا بنات

يقلون برجر هذي السنعه فيهم الله يخلف بس ) المهم يالربع ما لكم بالطويلة البنت الحين كبرت وصار عمرها 13

مربيتها أمها على الضفاره والذرابه صارت هي اللي تقابل أبوها إذا جاء وهي اللي تقهويه ( سنعه مثل أمها )

ولا فيها جمال يهبل ما تقدر تناظرها أكثر من ثلاث دقايق هالك المبسم اللي يالله تدخل معه العنبه,عاد كثرو

العيال اللي يتسنعون ويتملحون عند أبوها ( حركاتكم يالعيال اذا حطيتو عينكم على أحد ) اللي يسلم عليه في

المسجد واللي يحب رأسه واللي يقول تأمر شي ياعم أنا ولدك اللي ما تعبت عليه ويا كثر هاللي يحببون رأسه

والله ياجبهته أنحفرت من التحبيب كلن قام يتكلم ما شاء الله تبارك الله يابنت عند عبدالله بن علي بن دويرج ( اللي

هو شاعرنا اليوم ) المهم يالربع كبرت البنت وصار عمرها 16 وصارت هي اللي تقهوي أبوها وطيبه اذا بغا

يروح المسجد وتولم بشته عاد صار أبوها معتمد عليها في كل شي , الحاصل يوم جاء يوم من الأيام الله لا يعيد

الشر ولاها أيام شتاء مثل وقتنا الحين جاء هو بعد صلاة العشاء ولا حرمته شابه الجمر وحاطه عليه مركب أبو

ثلاث رجلين جنبه الدله وبريق الحليب قالو تبي نصب لك قهوة وإلا حليب قال اللي تبون , قامت الأم وصبت له

حليب يوم رشف الحليب قال كأنه بارد قالت لا نسخنه الحين قال قومي وأنا أبوك روحي جيبي لنا حطب عويدات

رمث ولا تجيبين طوال مره جيبي عويدات تدخل تحت المركب قامت البنت وخذت السراج وراحت للحوش تبي

تلقط حطب وقامت تلقط عويدات على قول أبوها تدخل تحت المركب ولا توها ملقطه ثلاث أو أربع وتلقى هاك

العود طويل بالحيل جت تبي تكسره على ركبتها وطق السراج وينجعف وينكب قازه ويطفي قامت هي تلمس في

الحطب يوم تلمست يا دافع البلاء وتقرصها داب مع أصبعها وتجي معوده وتصبر وتألم ماتبي تبين الابوها وما

تبي تزعجهم ( والله لوها من بنات الحين كان تفضح الدنيا بالسانها :p) المهم راح أول الليل ولا يوم كاد عليها

الوجع ودلت تقلب وتسدح مع الألم وتفزع الأم والجيران ويحطون هاك التمرة وعجين تمر ومدري ويش يبغونه

يفيد يوم يومين ويوم جاء نهار ثالث وهي توفي ولا يوم أنحشت كبد الأبو وقعد أربعة أشهر مثل الجرح قاطب

على صدره كل ما ذكرها يتزفر هاك التزفر الله يجيركم أن ناظر الباب هذا تذكرها يوم أنها واقفه عنده وتذكر

يومها تقلط له الغداء ويومها تقهويه .

عاد قال هالقصيده وهي من قصائد الرثاء .. :(:(





عفى الله عن عين(ن) حلى النوم جافيها
كراهـا قليـل وذارف الدمـع محفيهـا
إلى قلـت الا ياعيـن هيـدي وهـودي
جرى دمعها الصافـي وهلـت عباريهـا
تبين فروع الصبح مـا ذاقـت الكـرى
ولا لوم عين(ن) فارقت شوف غاليهـا
ولا زل يـوم أو ليلـه مــا تعـبـرت
على النـوح أعزيهـا ولانـي بقاويهـا
وأنا في زجا جزل العطا عالـم الخفـى
يلطف بحـال(ن) خافـي الهـم باريهـا
على نور عيني لـب قلبـي ومهجتـي
تحـن الضمايركـل مـا حـل طاريهـا
حنين الخلوج اللي عن الظيـر فاختـت
إلى غاب عنها ساعة(ن) مـا يباريهـا
وأنا كيف ما أبكي طفلة (ن) غضة الصبا
حوريـة(ن) سبحـان رب(ن) مسويهـا
نشت بالهدى والديـن والحـق والبهـا
فالو طالـت الأيـام مـا نيـب ناسيهـا
فيهـا طبـوع (ن) كامـلات حمـيـده
حنون على الجيـران وصـار عانيهـا
عفيفة نظيفة جيب مـا داسـت الخطـا
ولا هوجست بالمذهـب اللـي يرديهـا
حشا ما بها مـن خافـي العيـب ذارب
سواء حشمة الوالد فهـذا فهـو فيهـا
كمل عمرها ثنتين مـع عشـر وأربـع
سواء محترمها تسفهـه لـو يحاكيهـا
خذت هجنه(ن) فالبيـت عنـدى قليلـه
أمانه وخذهـا الخيـر اللـي عطانيهـا
فـلا نيـب جـزاع فـلا شـك ولعـه
أعرف الأمانة ما لهـا غيـر راعيهـا
فايا سامع دعواي فـي مظلـم الدجـى
تمحـي خطاياهـا وتثبـت حسانيـهـا
وتجعل لها فـي مجنـة الخلـد منـزل
وتقطف جنـا جنـات طيبـة وتجنيهـا
وتعوظهـا فيمـا قصـر مـن شبابهـا
برضـاك ياخلاقهـا وأنــت واليـهـا
ألهـي ودودي دعـوتـي تستجيبـهـا
على النفس كلها مـن غلاهـا نبديهـا
ألا وتكـدر خاطـري مــن فراقـهـا
ولـو لا غلاهـا مـا تكلفـت راثيهـا
سمية دمع المـزن فـي غبـة البحـر
سواء البنك ما يدرك ثمنهـا ويشريهـا
صلو على من لافتـرى سيـد الـورى
وأن مابـي إلايـوم يطـري سميـهـا
صلو على من لافتـرى سيـد الـورى
عدد ما جرى من رايح المـزن ودايهـا

تسلمين أختي همس الوجدان
على هذه القصة والقصيدة
كل الشكر لك

تقبلي حبي وصادق ودي

[align=center]همس الوجدان

الله يعطيك العافية

قصة محزنة
الله يحسن عزا ابوها ويصبره
عز الله انها فقيدة[/align]

[align=center]سلمتي اختي همس الوجدان

والله اني سمعت هالقصه والقصيده

من الراوي الشرهان

وفعلا قصه وقصيده محزنه


دمتي بود[/align]

[align=center]تسلمين غاليتي همس الوجدان

على هذه القصة والقصيدة

تحياتي وودي لك[/align]

[align=center][align=center]هموسه ياحبني لك والله

الله يعطيك الف عافيه يالغاليه

تقبلي تحياتي وتقديري[/align][/align]

[align=center]أختي همس الوجدان
الله يعطيك العافيه على
القصه والقصيده
تحياتي وتقديري لك[/align]

داام نبض قلمك الجميل للطرح الجميل لأبعد الحدود

كل الشكر والود لك اختي همس الوجدان

تحياتي وشكري لهمس الوجدان على القصه والقصيده
لو من بنات اليوم صمعت صريخها وانا قاعد اكتب
ولا لو مقروص يعض الناس كان جاك العلم
شكرا

تحياتي وشكري لهمس الوجدان على القصه والقصيده
لو من بنات اليوم سمعت صريخها وانا قاعد اكتب
ولا لو مقروص بعض الناس كان جاك العلم
شكرا