بنت الجزيرة ( طلال الرشيد )

يابن الحلال ان طعتني خل الاسراف .. واترك جمال الغيد لاهل البصيره


الزين موبس في الملامح والاوصاف .. الزين روح وعفه وطيب سيـره


مانيب من يهوى سريا وانصاف .. انـا هـواي وبـس بنـت الجزيـره


بنت الخليج اللي تماري بالاعراف .. وحنا نمـاري باسمهـا كـل ديـره


مالي غرام بقول وخا وبالزاف .. اذبحتنـي عنـد الطرحـه المستديـره


احب قولة ياهلا وعل وماخلاف .. من بنت ثوبي بنت الارض النضيـره


اللي تحلاها الظبي حلو الاطراف .. جمال فـي عفـه ورقـه وغيـره


واللي بها سحر مهو سحر عـراف .. ياعـل عيـن ماتراهـا ضريـره


عطف وحنان وذوق في لين الاعطاف .. والى كشفت لثامها شفت أميـره


صعب على اللي بالردي شاف ماعاف .. وحلوه علىاللي سنه الله ضميره


شمس الى من اشرقت والدجا طاف .. غابت نجومك غصب لو هي كثيره


السيف مايزهى سوى كف سياف .. والخيـل دون حصانهـا مستخيـره


بس أنت دورلك على قدك لحـاف .. وان طعتنـي دور بدلنـا عشيـره