جبت لكم سالفه مايطير طيرهااااا

أقدم لكم حبايبي قصة قديمة ..أو بالأصح موروث شعبي .. تناقلته الأجيال .. إلى يومنا هذا <<< قال إلى يومنا هذا قال.

هذا الله يطول أعماركم.. رجال .. على باب الله .. يطلع كل يوم .. يسترزق ربه له ولعياله وزوجته وبنته .. مرة يشتغل مع اللي يبنون إن كان نقصهم احد.. ومرة يشتغل حمّالي .. ومرة يطلع للبر .. يصيد أما ضب .. جربوع .. أو شي عالاقل يكفل له رزق اليوم.

ومرة من المرات.. طلع للبر.. يدور رزقه .. مشى الرجال .. وسج مثل ما يقولون وهو يمشي..ما درى .. إلا وذيك الرعيان قدامه (( الرعيان= قطعان من البهائم من إبل وماعز وبقر))
رعيان واجدة .. تسد عين الشمس .. ولا لها راعي.. إلا وحدةٍ عجوز.. وكانت تصلي يوم يجيها ..

راح لمها .. سلم عليها.. قال لها : ما معك احد يرعى عنك يا خالة؟ أما صبي .. أو
واحد من عيالك؟ قالت له لا والله أنا ما عندي صبيان ولا عندي عيال.. لكن
وشرايك أنت تعاونني برعيهن؟ وتأخذ منهن اللي تبي؟؟ كان تبي تحلب.. أو تبي
تقشد.. أو تبي تذبح وتأكل من لحمهن..وأنا خلني أبي أتفرغ لعبادتي وصلاتي..
قال لها خليني أشوف مرتي وعيالي.. قالت شفهم وتعال..

الرجال راح لبيته يركض .. دخل على مرته وعياله .. قال السالفة كذا وكذا..
وإني لقيت عجوز تقول لي كذا وكذا .. وشرايكم؟ قالت مرته .. هذا رزق لنا من الله .. مشينا لمها ..

والله وراحوا لمها .. ويوم وصلوا إلا هذي هي جالسة تصلي..
فرغت من صلاتها .. والتفتت عليهم .. ترحب بهم وتهلي بهم ..
قالت امشوا معي .. اوريكم البيت.. راحوا معها .. دخلوا على ذاك البيت..
اللي من كبره .. له 4 أبواب .. كل بابلحاله.لى خلا لحاله ..
وبين الباب والباب .. ممشى يوم..

البيت هذا بداخله 3 بيوت .. ورتهم العجوز واحد من البيوت هذي قالت هذا بيتكم .. تقعدون فيه وتنامون .. وأنا بيتي اللي توالكم من الجهة الثانية.. باقعد فيه ..
أنا بأتفرغ لصلاتي وعبادتي .. وأنت يا الرجال تقوم الصبح ترعى بالبهم .. والى منك رجعت على مسيّان .. خل مرتك كان تبي تحلبهن .. وتقشد منهن .. أو تبون تذبحون منهن ..قال الرجال.. يصير خير ان شاء الله ..

وبالفعل .. صار الرجال يصبح الصبح .. ويطلع بهن يرعاهن .. والى منه قبل تغيب الشمس .. رجع بهن .. وجت مرته تحلبهن وتذبح منهن وتطبخ.. وعلى هالحالة..
يوم من الأيام ..يوم رجع الرجال وقعدت مرته تحلب ..وكانت البهم صافّة على جدار يفصل بين بيت الرجال وعياله .. وبين بيت العجوز .. وكان الجدار هذا فيه فتحة..
وكانت الرجال يخلي الرعيان تقعد عند الجدار هذا عشان تجي مرته وتشوف شغلها..
المهم.. قعدت تحلب المرأة .. وطاحت عينها على الفتحة هذي طلت منها ..
إلا هذي العجوز اللي هم عندها.. ذابحه لها شايب وتأكله .. طلت مرة ثانية ..
علشان تتأكد .. إلا والله هذا اللي يصير صدق.

راحت لزوجها تتنافض وتركض.. قالت له قم .. قم بسرعة .. شف خالتك طلعت سعلوّه..
((السعلو:كائن خرافي يُصَوّر على أنه كائن بشري آكل للحوم البشر))
قال : وشو؟؟ لا والله .. ماهي سعلوّه .. إلا يوم شبعتي وفسقتي قلتي هالكلام.
قالت ما تبي تقوم؟؟ قال .. لا مابي أقوم ..
قالت أنا ألزم ما علي عيالي بأخذهم وباطلع .. والبنت باخليها عندك..

البنت كانت مريضة و تصيح بذاك الوقت .. فكرت الزوجة قالت لو بأخذها .. بتسمع العجوز صياحها وبتلحقنا .. ووش بيفكنا منها عاد..

خذت المرأة عيالها وراحت تركض .. وطلعت من البيت وهي تركض .. لييين ما وصلت للديرة.. وتدخل الديرة وتروح لبيتهم .. وتحمد ربها وتشكره اللي اعتقها هي وعيالها من العجوز.

الرجال قعد مع بنته .. وزي ما قلت البنت كانت تعبانه .. وكنت تصيح..
قامت العجوز الفجر .. وتسمع صياح البنت .. راحت لبيت الرجال تنادي زوجته..
طلع لها الرجال .. قالت له البنت وش فيها؟ أخلفتني.. لا أنا اللي عرفت أتعبد ولا أنا اللي عرفت أصلي.. ليش ما تحلبون لها وتعطونها؟؟

قال لها الرجال .. أمها اللي تحلب لها .. هجت .. قالت العجوز هجت؟؟ ليه؟؟
قال لها .. تقول لي قم شف خالتك سعلوّه.
قالت العجوز .. وأنت وش قلت لها.. قال .. قلت لها يوم شبعتي وفسقتي قلتي شف خالتك سعلوه؟
قالت .. ايييه.. اجل من وين تبي ابدأ بك .. من لحيتك؟ ولا من رجليك؟
ضاق صدر الرجال .. ودرا إن زوجته كانت صادقه.. وهو ما سمع كلامها..

قال للعجوز .. لا والله .. ابدأي من لحيتي.. مير وش فود لحيتي يوم ما طاعت شوور مريتي ..
وقامت عليه .. واكلته .. وخلت بنته عندها..

مرت الأيام .. وكبرت البنت .. اللي كانت ذهينة .. وفطينة وراعية دبرة.
وصارت هي اللي تطبخ للعجوز .. تجيب لها العجوز من ذا الاوادم .. والبنت تطبخهم لها .

وبيوم من الأيام .. دخلت السعلوّه .. ومعها شايب ذابحته ..
نادت البنت .. يوم جتها .. قالت لها.. اطبخي لي هذا..قالت البنت طيب .. وأخذته البنت وراحت للمطبخ .. وشبت النار .. وحطت القدر على ما يفور .. وسلخت الشايب وعلقت جلده عندها..
ويوم بدأ ماء القدر يفور .. حطت البنت لحم الشايب وقعدت تطبخه..وحطت عليه ملي يدينها فلفل .. وملي يدينها ملح..
وخلته يطبخ شوي ..

السعلوّه كانت لاهية.. فجأة .. سمعت البنت تصرخ.. راحت لمها تركض..قالت لها وش فيك؟
قالت البنت .. حااااار .. حار .. ذوقي ذوقي.. وتغرف البنت من القدر وتعطيه السعلوّه تذوق..

ذاقته السعلوّه.. مير تأكل لسانها الحرورة.. وتصرخ .. قالت ووععععع .. وش ذا .. حاااار..ومررررررر

قالت البنت.. إيه يا خالتي .. هذا لحم الشيبان .. حار ومر.. مير حرمي على روحتس لحم الشيبان تراه موب زين..
قالت السعلوّه.. إيه يا بنيتي .. يحرم علي لحم الشيبان طول عمري..مير طفي النار يا بنتي وخليه ما نبيه .. اذبحي لي من الغنم .. واطبخيه..

قامت البنت وذبحت من الغنم وطبخته .. ويوم خلص ودته للسعلوّه .. تعشت عليه ونامت..

البنت استغلت فرصة نوم السعّلوه .. قامت وجمعت عفشها.. ولفته ببقشة معها..
ولبست جلد الشايب.. وتأخذ عفشها وتطلع.. والسعلوّه نايمة ولا تدري عنها..

قامت السعلوّه من بكرا .. تنادي البنت .. ما ترد .. تنادي .. ما ترد..راحت تدورها .. إلا والله البنت مهيب فيه.. وين راحت؟؟
طلعت تدورها .. وتصرخ وتناديها .. وتدوّر وتدوّر وتدوّر..
لقت شايب يمشي لحاله .. قالت له يا شايب .. وهو يلتفت عليها .. قالت ما شفت البنت؟
قال هاه؟؟ البنت؟؟ البنت طارت .. وهو يأشر بأصبعه فوق ..
حمقت السعلوّه .. قالت امش الله أبوك من شايب .. فيه بنت تطير؟ مير والله لو ماني محرمة على روحي لحم الشيبان ولا كان قايلة بك الحين .. مار الشرهة علي اللي أسألك.. وخلته وراحت تدور البنت ..

الشايب هذا كان هو نفسه البنت بعد ما لبست جلد الشايب اللي جابته لها السعلوّه علشان تطبخه..

راحت البنت (( الشايب)) تمشي .. وتمشي .. لين ما لقت لها بدو .. دخلت عليهم وقعدت عندهم.. جو لمها وقالوا لها .. تسرح بالبعارين يا شايب؟
قالت لهم .. إيه اسرح بالبعارين..
قالوا زين .. خذ هذي البعارين .. هذا بعير الشيخ .. وهذا بعير ولد الشيخ .. وهذا بعير فلان وبعير فلان .. و .. و .. و ..
تأخذهن الصبح للغدير.. والعصر ترجع بهن.. قالت زين
وصارت كل يوم تطلع بالبعارين للغدير وتخليهن يسرحن .. وصارت هي بعد إلى منها وصلت للغدير .. تفصخ جلد الشايب عنها .. وتفصخ ملابسها .. وتدخل الغدير .. وتغسل .. وتغسل شعرها .. وتطلع وتلبس ملابسها وتلبس الجلد ..

مرة من المرات شافها بعير ولد الشيخ.. وعشقها .. صار كل ما طلعت بالبعارين تسرح.. يجي بعير ولد الشيخ ويقعد عندها .. ويناظرها ..
والى منها رجعت بالبعارين ..صار لبعير يلف وجهه للمكان اللي هي تقعد فيه .. ويبتل يناظر ..

ولد الشيخ حس إن بعيره تغير عليه.. موب بعيره اللي هو خابر.. قال بنفسه والله ان كانه مسوي ببعيري شي.. إني لا افك راسه عن رقبته ..
وفكر .. وقال مالي إلا انه إذا طلع يسرح بالبعارين لحقته .. وشفت وش يسوي
ويوم جاء من بكرا.. قامت البنت(( الشايب)) وأخذت البعارين .. وراحت ترعى بهن وتسرح .. وصلت للغدير.. وفصخت جلد الشايب عنها ..وفصخت ملابسها ودخلت الغدير .. وغسلت روحها .. وشعرها ..
قام ولد الشيخ ولحقها .. وطلع فوق ضلع .. وقعد يطل عليها بيشوف الشايب هذا وش يسوي ..
يوم شاف .. إلا هذا الشايب رفيقهم يفصخ جلده .. وتطلع منه ذيك البنت .. اللي تملع القلب .. وهي تملع قلبه .. ويعشقها .. من زود عشقه حط براسه انه يتزوجها .. بس شلون يقنع أهله وجماعته إن الشايب هذا أصلا موب شايب .. وانه بنت وتلبس جلد شايب..؟؟
فكر وفكر وفكر .. ومرة من المرات كانوا جماعته متجمعين عنده ..
قال يا جماعة أنا أبي أعرس.. قالوا والله هذي ابرك ساعة.. من تبي بس؟
قال بس قبل ما أعرس.. تراني حالف بالله إني آخذ شايب.. وأبي الشايب هذا .. ويأشر على اللي يسرح ببعارينهم..

قالوا له دامك حالف اجل مالك إلا حلفك ..

وبالفعل .. جاء واخذ الشايب .. وسووا له عرس .. عرسه هو والشايب..

ويوم خلص العرس .. وراحوا للخيمة اللي يقعدون فيها المعاريس بالعادة ..دخل على الشايب .. وسلم .. رد عليه الشايب السلام .. قال ولد الشيخ.. يا شايب.. افصخ جلدك..
قال الشايب .. ما عودت الناس تفصخ جلودها .. قال ولد الشيخ .. يا شايب افصخ جلدك.. رد الشايب قال ما عودت الناس تفصخ جلودها ..
قال ولد الشيخ يا شايب افصخ جلدك.. وتقوم البنت وتفصخ جلد الشايب عنها..
وتطلع.. مير ينملع قلب ولد الشيخ بزود .. وهو يطلعها .. ويأخذ جلد الشايب عنها ..ويطلع بها قدام أهله ويقول ابي أعرس عليها ..
طبعاً القصة هذي خرافية وقديمة .. وسمعت أكثر من شايب وأكثر من عجوز تقولها .. قلت أبي اكتبها لكم.. وأتمنى تحوز على إعجابكم ورضاكم

حلوه السالفه
وأكثر شي أعجبني بعير ولد الشيخ ههههههههه

مشكور أخوي حصان الرجلية

[align=center]حصان الرجليه
الله يعطيك العافيه
على القصه الخرافيه
بس خوفتنا بها السعلوه ههههههههه
تحياتي لك[/align]

[align=center]ههههههههههههههههههههههههههههههههههههههه


الله يضحك سنك يالحصان


ليش ابو البنت مادق 999

يجونه على طول ههههههههههههههه


اما حلوه ابدي بلحيتي اللي ماطاعت شور حرمتي هههههههههه


ذكرتني بقصة الشهيب الي يخرعونا بها واحنا اصغار [/align]

المشاركة الأصلية كتبت بواسطة أبــــ بنت ــــوهـا

حلوه السالفه
وأكثر شي أعجبني بعير ولد الشيخ ههههههههه

مشكور أخوي حصان الرجلية

الف شكر اختي بنت ابوهاااااا على مرورك

المشاركة الأصلية كتبت بواسطة عذاب

[align=center]حصان الرجليه
الله يعطيك العافيه
على القصه الخرافيه
بس خوفتنا بها السعلوه ههههههههه
تحياتي لك[/align]

ههههههه ياخي انت مراقب هالحين مايخوفك غير الرئيس الفخري هههههههه

الف شكر لمرورك اخوي عزززززززاب

المشاركة الأصلية كتبت بواسطة نايف النمران

[align=center]ههههههههههههههههههههههههههههههههههههههه


الله يضحك سنك يالحصان


ليش ابو البنت مادق 999

يجونه على طول ههههههههههههههه


اما حلوه ابدي بلحيتي اللي ماطاعت شور حرمتي هههههههههه


ذكرتني بقصة الشهيب الي يخرعونا بها واحنا اصغار [/align]

اقول اكتب زين ورد على جميع المواضيع واسمع كلام حريمتك لاتجيك السعلوه وسعلوت المنتدى بنت ابوهااا هههههههههه

هههههههههههههه

حصان الرجليه
الله يعطيك العافيه


من جد مواضيعك شيقه وجميله

والله اني انبسط اذا شفت لك موضوع خاصه بالاستراحه


ننتظر جديدك بفارغ الصبر

تحيتي لك

ابشري والله بالاقلاع والتسذب ههههههههههه

[align=center]هههههه

طيب ليش البعير ما مخمخ ولبس جلد ناقة وتروش معها

الله يهني المعاريس[/align]