تناتيف خاصه للغالين

[align=center]صباحكم تفافيح .. ومساكم كالعاده بردقان<< راعي بوفية ،،
0
0
0
فكرت يا جماعة والكلام بيني وبينكم اني اسويلي قناة فضائية واتسدح في اللوكيشن على ما قالوا واتبطح واطرح لي مواضيع مال امها داعي واطلب نقاشها من المهبل والسلنتح اللي دابلين تسبدي في القنوات الفضائية
احبتس ياميرهان وعاد اسمها الحقيقي (عمشا)واهدي مهند اغنية رابح الجديده طبعا اسمه (سالم بن شليويح ) مير عشان البنات يتطامرون على هالمهند اللي جبهته تقول لمبة كوع ام ريالين.
الموووهيم احط لي في هالقناة شعار حب بالضمة
يعني ماهوب اللي راح تفكيركم له الله يفرج كربة هل الحلال ’ وخذ عندك من هالرسايل اللي كل وحدة منها تعادل علبتين تونه ام 4 ريال والله انه في خلال شهر لاادفن والدين الفقر وان اعيد بناء ثلاث دول من ادغال افريقيا
واحط فيها فرع للقناة اللي برامجها ادعو للواايلي
ان الله يوفقه ويكثر ماله ويكثر المهبل اللي بديرته ، الواايلي الخير


عاد ابغير اسمي << بكيفي ياجماعة هماني بتاجر
0
الموهيم لي عدة انشطة راح اسويها على حساب الدلوخ اللي على شاكلة سالم وعيضة ومناحي المذكور سابقا في موضوعي الاول وعمشا (البردقانه) ومزنة اللي بين قوسين اسمها الفني (دلوعة ماما) الله واكبر يامزنة بعد البرقع اللي كنه سروال افغاني دلوعة ماما نعنبوا ديارتس ابتس ماما هذي ما قطع ظهرتس بلي الغاز الا هي وتقولين دلوعة بلاتس والله خارطة الطريق اللي مطبوعتن على جبهتس من دافور الماما يوم تأخرتي بالمضير لا تزهبينه.
اييييييييييييييه يالربع وش اللي خلانا نسترسل في الماضوع وهو قصير الخلاصة انا ابسدحلي قناة واصفها جنب قنوات الساحة والمضراب مدري المرقاب واحط رجل على رجل واشيك على الحساب بعد كل ساعة على الكمتوتو حقي وافصل من الوظيفة اللي اذا قمت لها الصبح يجيني مر على تسبدي من هالخطوط وهالزحمة حتى فوال باقبص ابتصل عليه يجيب فول الطاوة الى حدي بالتلنننفون وتميس ومطبق بعد هااااهـ<< والله التفكير المطنطقي
المووووهيم
صراحه دريت أني ماكتبت شي مُقارنه عند بعض الشباب اللي سفط الطبلون وتعدّت مُشاركاته الثلاثة آلاف.. الله يخلف علي ( 1000) مُشاركه وكل وحده سبع سطور ونصف وكلها شكرا جزيلا واغلبها في الشامبو والكهرب اللي بالاستراحة لا بارك الله في ابليس ..
0
وبعض المواضيع الله يخلف بس أهم شي أن مضمونها يناسب ذوق الجميع .. وترى أول عشره يدخلون مواضيعي لهم هديه وتخفيض 70% في جميع فروعنا بمحلات الخُضار بالديره .. وترانا مانشحن بطاقات شحن جوّال << والله يافيه ناس تموت في شي إسمه بطاقة شحن .. بعدين محلاتنا الخُضار نزّلنا فيها أنواع جديده بدال ماكنّا ننزل بس ( بردقان وموز ) .. طحنا في المنقا والفاكهه الشاميه والخوخ المدحرب .. أدخل وتنقّا .. ولاتنسَ ترخي ريالك وانت طالع – الله لايهينك -
.. حتى خدمة التوصيل طبقناها عندنا على أرض الواقع .. ومايمديك ترفع السماعه إلا وصندوق التفّاح شفه عند بابك .. والتخطيط مُستقبلاً أننا نخلي الطلب ( بالنيّه ) .. يعني إذا نويت ذاك اليوم على بطاطس ومشتهي تتغدى عليه أنت وام العيال فاعتبر كرتون البطاطس عندك .. ونيّتك محشومه يابعدي !
طولنا عليكم وهي قصــيره .. وهذي عادتي .. تاحذني السوالف " دوغري " خاصّه مع اللي أحبهم وما أدري عن نفسي إلا واخوي الصغير ( صويلح ) يطق ظهري من وراي ويقول ترى الناس ملّت وجاها النوم .. حاول تختصر ؟

0
عنوان الموضوع يقوطر رومانسيه .. وكلّه دلع وخقخقه .. وهذي الموضه ومواكبتها .. ولازم الواحد من تالي يتطوّر ويمشي زي العالم .. إلى متى واحنا متجوّخين بين اكياس الشعير وصبايب الحلال .
الحُب
كلمه عظيمه وكلّها على بعضها ( حرفين ) .. سهلة الكِتابة والنُطق .. بل وحتى الإنتساب لها !
من صغرتي وانا اسمع كلمة ( احبك ) .. بس من تالي حاولت أفكفك أبو حروفها وشفراتها واحاول أني أوصل لمكنونها وحوافرها اللي يمكن تكون خافيه علي .
0
0
0
في المدرسة ومن أيام الإبتدائي كان مُدرّسنا ( حامد أبو طبنجه ) .. أجنبي عن البلد .. وكان من يبدى الدرس وهو يفكّر ويخوبص بعلومه وبدل مايقول ( واحد زايد واحد يساوي كمْ ؟ ) كان يقول ( إذا صرت أنا أحبّها .. خبّروني باللهِ كيف الطريق ) !
حتى مُدير المدرسه ( حسن لبنيه ) كان يحب بشكل خطير .. حتى إن جدارن المدرسه زمان ودورات المياه – الله يكرمكم - كانت تشرشحه وكان يُكتب عليها بالخط العريض الأحمر .. والمتنيّل بسبعين نيله : ( يا شباب .. ترى المُدير حسن يحبّها وحبّه مقطّعن كرشته يوم انه يجي الصباح متأخر )
0
0
بل أن الحُب تعدّاهم ووصل للفرّاش اللي كان معلّق على باب المدرسة لوحة صغيره كرتونيّه وكاتب عليها بخطّه اللي رايحن فيها : ( الحُب طريقك للهلاك واكبر دليل شوفو حالتي ) وحاط سهم صغير على باب غرفته !
0
0
يعني تفكيري كان ممزوج من صغرتي إلى حد شبابي الآن يوم صرت أفكّر في كلمة ( حُب ) .. واحاول أعرف وش تكون هالكلمه ومن أي ديره ومن أي حموله ووين ساكنه !
يقولون أن الحُب مصّع قلوب البعارين .. بل حتى أنه وصل لدرجة أن البعض صار يرسم ويخطط على جدارن الحواري ولاتهون أبواب الحمّامات - الله يكرمكم – :
احبك حب جوعان – يشوف الحطب ( شابوره )
واحبك حب سكران – ينادي العنـز ( يانوره )
0
وقبل كم يوم كنت ( حاقطن ) أذني على الوالده وهي تكلّم خالتي .. وهذا من زود الفراغ اللي عندي .. يعني لما أشوف نفسي فاضي أسحب نفسي شوي شوي لين أوصل للسماعه وتكون الوالده تكلّم لها وحده من الحريم .. واحاول أسترق السمع والقط من سواليف هالحريم اللي تخليني أموت عليها من الضحك .. كانت الوالده تكلّم خالتي وتقول لها : هاه وش عشاكم اليوم .. قالت خالتي : عشانا اليوم ( مرقه ) .. طقّتها ضحكه الوالده – الله يطوّل بعمرها – وقالت : أجل رجلتس اليوم مهوب فيه << والله السوالف بعد !
بعدها تغيّرت الموجه من الوجبات الغذائية إلى الكلام عن بنت جارتنا ( فاطمه ) وان رجلها ماحبّها .. وانها راحت لبيت اهلها بعد ماجمعت عفشها وشالت اغراضها .. وان رجلها اصلاً مهوب " صريْ " يوم انه يسافر لبرا وتاركن مرته عند بزرها .. حتى الحليب حق بزرها ماشراه لها !
وختمو السالفه بسرعه يوم ان رجل خالتي دخل البيت واختبصت خالتي وقالتي للوالده : يالله رجلنا جا .. سلام .. وسكّرت السماعه في وجه الوالده !
مسكينه ( فاطمه ) رجلها مايعرف من الحُب إلا اسمه .. ولايعرف من طريق الحُب إلا رسمه !
دحيّم يحب سويّر .. وراشد يحب عنزته بالحوش .. وسالم المنزوي مايحب إلا ( جعفر ) راعي المطعم عشان بطنه .. وانا حُبّي غير !
قبل أيام كانت الوالده الغاليه في سفره ليست بالقريبه .. بل بعيده بالنسبه لي .. وحين حضورِها للمنزل بعد عناء سَفَرِهم المُتعِب .. وقعت في فراشِها تعباً من طول السفر ..
كُنت أنا خارج المنزل .. حاولت السُرعه في قطع الطريق لأنال منها ( قُبلةً ) على رأسِها الحاني .. ولكن – قدر الله وماشاء فعل –
حضرت للمنزل .. وجدتها ( نائمه ) .. حينها قُلت في سِوارِ نفسي ( حبيبتي نامت ) .. وخططت هذه الكلمات والتي هي أقلّ من القليل بشأن من أُحِبُها من كُل قلبي !
0
0
0
0
فديييتس يالطخما ،،[/align]

[align=center]سرد كوميدي ساخر ورائع
تسلم أخوي الوايلي
وأهنئك على هذا الأسلوب المشوق

تقبل تحياتي وتقديري


[/align]

[align=center]

المشاركة الأصلية كتبت بواسطة أبــــ بنت ــــوهـا

[align=center]سرد كوميدي ساخر ورائع
تسلم أخوي الوايلي
وأهنئك على هذا الأسلوب المشوق

تقبل تحياتي وتقديري


[/align]

كل الشكر والتقدير لمرورك العطر[/align]

[align=center]صياغة مبدع


نقد باسلوب ساخر

لا هنت[/align]