غلا البنت عند ابوها

جبنا لكم قصيده عساها تعجبكم ان شاء الله
هالشاعر من شعراء السرمن أهل بلدة جفن توفي عام 1356 (عاد ما نيب قايل اسمه إلا في وسط القصة )



هالشاعر يوم كان شباب كان يشتغل في النخيل وبعد ما كبر صار يشتغل في البناء والطين هذا الشاعر عاش في
منطقة السر وتزوج في أول شبابه وجاه ولد ولا قعد عنده طير مثل هالعيال اللي يطيرون , راح واستقر في
المنطقة الشرقية , وجلس هالرجال فتره ما عنده أحد ولا عنده حرمه ولا هاك الحرمة الصالحة الدينه اللي
متوفي عنها رجلها تقدم لها وخذها وهو على كبر ويوم خذها ولاها حرمة ذربه وفيها دين وضفره بالحيل وبعد
فتره رزقه الله هاك البنية من هالمره . وبدت البنية تكبر ودائماَ البنت لها حنان خاص من أبوها والبنت دائماَ
الطف من الولد المهم كبرت البنت , والحاصل يالربع أن هالرجال في هالبيت عنده هالمره مدللته وماشاء الله
عليها ضفره وسنعه تسوي قرصان وجريش هالجريش اللي ما شاء الله تقول كأنه دماغ جربوع ( عاد من فيكم شاف دماغ الجربوع) هذولي الحريم الضفرات اللي يطبخن قبل كذا عاد وين تلقونهم الحين ( ما عاد فيه إلا بنات يقلون برجر هذي السنعه فيهم الله يخلف بس ) المهم يالربع ما لكم بالطويلة البنت الحين كبرت وصار عمرها 13
مربيتها أمها على الضفاره والذرابه صارت هي اللي تقابل أبوها إذا جاء وهي اللي تقهويه ( سنعه مثل أمها )
ولا فيها جمال يهبل ما تقدر تناظرها أكثر من ثلاث دقايق هالك المبسم اللي يالله تدخل معه العنبه,عاد كثرو
العيال اللي يتسنعون ويتملحون عند أبوها ( حركاتكم يالعيال اذا حطيتو عينكم على أحد ) اللي يسلم عليه في
المسجد واللي يحب رأسه واللي يقول تأمر شي ياعم أنا ولدك اللي ما تعبت عليه ويا كثر هاللي يحببون رأسه
والله ياجبهته أنحفرت من التحبيب كلن قام يتكلم ما شاء الله تبارك الله يابنت عند عبدالله بن علي بن دويرج ( اللي
هو شاعرنا اليوم ) المهم يالربع كبرت البنت وصار عمرها 16 وصارت هي اللي تقهوي أبوها وطيبه اذا بغا
يروح المسجد وتولم بشته عاد صار أبوها معتمد عليها في كل شي , الحاصل يوم جاء يوم من الأيام الله لا يعيد
الشر ولاها أيام شتاء مثل وقتنا الحين جاء هو بعد صلاة العشاء ولا حرمته شابه الجمر وحاطه عليه مركب أبو
ثلاث رجلين جنبه الدله وبريق الحليب قالو تبي نصب لك قهوة وإلا حليب قال اللي تبون , قامت الأم وصبت له
حليب يوم رشف الحليب قال كأنه بارد قالت لا نسخنه الحين قال قومي وأنا أبوك روحي جيبي لنا حطب عويدات
رمث ولا تجيبين طوال مره جيبي عويدات تدخل تحت المركب قامت البنت وخذت السراج وراحت للحوش تبي
تلقط حطب وقامت تلقط عويدات على قول أبوها تدخل تحت المركب ولا توها ملقطه ثلاث أو أربع وتلقى هاك
العود طويل بالحيل جت تبي تكسره على ركبتها وطق السراج وينجعف وينكب قازه ويطفي قامت هي تلمس في
الحطب يوم تلمست يا دافع البلاء وتقرصها داب مع أصبعها وتجي معوده وتصبر وتألم ماتبي تبين الابوها وما
تبي تزعجهم ( والله لوها من بنات الحين كان تفضح الدنيا بالسانها ) المهم راح أول الليل ولا يوم كاد عليها
الوجع ودلت تقلب وتسدح مع الألم وتفزع الأم والجيران ويحطون هاك التمرة وعجين تمر ومدري ويش يبغونه
يفيد يوم يومين ويوم جاء نهار ثالث وهي توفي ولا يوم أنحشت كبد الأبو وقعد أربعة أشهر مثل الجرح قاطب
على صدره كل ما ذكرها يتزفر هاك التزفر الله يجيركم أن ناظر الباب هذا تذكرها يوم أنها واقفه عنده وتذكر
يومها تقلط له الغداء ويومها تقهويه .

عاد قال هالقصيده وهي من قصائد الرثاء

[poem=font="simplified arabic,5,limegreen,normal,normal" bkcolor="transparent" bkimage="" border="double,5,green" type=0 line=0 align=center use=ex num="0,black"]

عفى الله عن عين(ن) حلى النوم جافيها = كراها قليل وذارف الدمع محفيها

إلى قلت الا ياعين هيدي وهودي = جرى دمعها الصافي وهلت عباريها

تبين فروع الصبح ما ذاقت الكرى = ولا لوم عين(ن) فارقت شوف غاليها

ولا زل يوم أو ليله ما تعبرت = على النوح أعزيها ولاني بقاويها

وأنا في زجا جزل العطا عالم الخفى = يلطف بحال(ن) خافي الهم باريها

على نور عيني لب قلبي ومهجتي = تحن الضمايركل ما حل طاريها

حنين الخلوج اللي عن الظير فاختت = إلى غاب عنها ساعة(ن) ما يباريها

وأنا كيف ما أبكي طفلة (ن) غضة الصبا = حورية(ن) سبحان رب(ن) مسويها

نشت بالهدى والدين والحق والبها = فالو طالت الأيام ما نيب ناسيها

فيها طبوع (ن) كاملات حميده = حنون على الجيران وصار عانيها

عفيفة نظيفة جيب ما داست الخطا = ولا هوجست بالمذهب اللي يرديها

حشا ما بها من خافي العيب ذارب = سواء حشمة الوالد فهذا فهو فيها

كمل عمرها ثنتين مع عشر وأربع = سواء محترمها تسفهه لو يحاكيها

خذت هجنه(ن) فالبيت عندى قليله = أمانه وخذها الخير اللي عطانيها

فلا نيب جزاع فلا شك ولعه = أعرف الأمانة ما لها غير راعيها

فايا سامع دعواي في مظلم الدجى = تمحي خطاياها وتثبت حسانيها

وتجعل لها في مجنة الخلد منزل = وتقطف جنا جنات طيبة وتجنيها

وتعوظها فيما قصر من شبابها = برضاك ياخلاقها وأنت واليها

ألهي ودودي دعوتي تستجيبها = على النفس كلها من غلاها نبديها

ألا وتكدر خاطري من فراقها = ولو لا غلاها ما تكلفت راثيها

سمية دمع المزن في غبة البحر = سواء البنك ما يدرك ثمنها ويشريها

صلو على من لافترى سيد الورى = وأن مابي إلايوم يطري سميها

صلو على من لافترى سيد الورى = عدد ما جرى من رايح المزن ودايها [/poem]
[align=center]على فكره القصيده سمعتها من الراوي الشرهان وهي موجوده في العديد من المواقع[/align]

اخوي ابن صعيجر
يعطيك العافية على نقل هالقصة والإستشهاد بالقصيدة


ابدعت باختيارك

اخوي ابن صعيجر
الله يعطيك العافية
على نقل القصه والقصيده


[align=center][/align]

[align=center]
تسلم أخوي ابن صعيجر
الله يعطيك العافية
على هذه القصة والقصيدة
كل الشكر لك

تقبل تحياتي وتقديري


[/align]

[align=center]تسلم أخوي ابن صعيجر
الله يعطيك العافية
على هذه القصة والقصيدة


دمت بخير


[/align]

[align=center]
حنين الخلوج اللي عن الظير فاختت
إلى غاب عنها ساعة(ن) ما يباريها

الله يرحمها قسم بالله من اروع القصص التي اطلعت عليه

صراحة الله يلوم اللي يلومه في هالبنت

فقيدة تكسر الحطب على ركبها

وين زمانها وين زمنا[/align]

[align=center]الاخ ابن صعيجر

بيض الله وجهك على نقل هذه القصه والمحزنه بنفس الوقت مشكر لاهنت وتقبل مروري[/align]

[align=center]تسلم أخوي ابن صعيجر

على هذه القصة والقصيدة

كل الشكر لك

تحياتي وخالص تقديري[/align]

يعطيك العاافه على هالنقل الجميل

بسراحه البنت ماتنعطا وجه <<<<<< لحد يزعل

البنت تنربا على انها ربت بيت تخلي الترتيب والتنظيف

هوايهـ لها

[align=center]الله يعطيك العافية اخوي ابن صعيجر
والف شكر لك على هذه القصة والقصيدة
تقبل تحياتي ومروري[/align]