قصيدة رائعه

--------------------------------------------------------------------------------

بسم الله الرحمن الرحيم
السلام عليكم ورحمة الله وبركاته
عسى الهون لأهل الهون والجود لأهل الجود ** وعسى الله يعطي كل حيٍ على ظنّه
وعسى أهل النوايا الباطـلة والقلوب السود ** يعاقبـهم اللـه ومـا يدخـلهم الجنّه
حشى ما يجدد لـك جروح الحشا يا كود ** اليا جت من الـلي ما توقعـتها منّه
تصبرت أخـاف من المشـاريه والمنقود ** وأنا مؤمـنٍ وأصلي الفرض والسنّه
أقـدّر وأسامـح وأحسب نقصها والزود ** الين يتـمادى بـ الخطأ راعي العنّه
وأحب الصميدع وأذخره فزعة المضهود ** وأداري عـليه من المنـاقـيد وأحنّه
وفعل الوفـا مني لـ راع الوفـا مردود ** ولاهـوب لـكني إليـا صار لـكنه
هواجيسي وشعري كـما النار والبارود ** ومن غير لا أعمّر من التـتن وأكنّه
على ما قسم ربي وجودي من الماجود ** أحفر الصخر وأسخّـر القاف لين أنّه
يجـي سلسـبيلٍ حـاليٍ صافيٍ قرهود ** ومثـل الجنـيهي في بريـقه وفي دنّه
وهبني جزيل المـدّ والفضـل للمعبود ** ولا غير وهـاب الوهايـب لـه المنّه
على طول حبل المعـرفة حبلها ممدود ** وعلى كـل فـن وكل فـنان لـه فنّه
أدور علـيها درب لو دربـها مسدود ** وأدندن وأجـرّ الصوت وأطوّح الونّه
طموحي ولو دونه حنين ودويّ رعود ** ولو صار مهـما صار ما عني وعنّه
لـ عين الهنوف الفارع أم العيون السود ** وذيك الجـدايل والشفـاتين والبنّه

أخوي البتال يعطيك العافيه وتقبل مروري