قل للعـذاري يلبسـنَّ العمايـم

اذا المراجل لبسة شمـاغ وعقـال
قل للعـذاري يلبسـنَّ العمايـم




ماعاد يفرق زول حرمه ورجَّـال
دام الفعايل تشبه البعـض دايـم




المرجله ماهي بكلمـه وتنقـال
وتروح ماراحت هبوب النسايم




ولا خشونة صوت أو رفع الأثقـال
أو رزَّة صدور وفعل الزلايـم




ولاهي بعد مفتاح موتـر وجـوَّال
والا ردى لسانن حديثه شتايـم




المرجلة شيمه عن القيـل والقـال
رفيع نفس(ن) حـر بالجـو حايـم




المرجله عقلٍ وزن وزنـه جبـال
ودون العقل وش فرقنا والبهايم ( أعزّكم الله )





يامسندي لومايل الوقت بـي مـال
ياولد أبويـه ياعظيـم العزايـم




يامعرب الجدّين من العـم والخـال
يانخوة المفزوع وقت الهزايـم




المرجله ياخوي هي طولـة البـال
هي العزم هي الصبر فالظلايـم




فيها الكـرم عـزه دلـه وفنجـال
فيها الكرامه عن ردى الطبع شايم




والدين لامنـّه خـذا القلـب منـزال
مشى طريق الحق وابليس نايـم




ومن لاعرف ربه في طيب الحـال
لابد وقت الضيق بالهـم هايـم




حتى صلاتك مع جماعات ورجال
في خيرها ياخوي نعم الغنايـم




ولامن نصف ليلك قم صفي البـال
ياعظم أجرك بين ساجد وقايـم




ولامن رفع ربَّي له كل الاعمـال
حسن الذكر لاقالوا فلان صايـم




وخلك شريف القصد ياطيب الفـال
سوء المقاصد فالبيوت الهدايـم




واحذر تبيع النفس في دب الأنـذال
وتتبع خوي ابليس راع النمايـم




النفس خيل لـك اذا كنـت خيـال
ومن لاقوى نفسه قوته الهزايـم




ولاصرت ماتدري لوش انت رجال
والله خسارة فيك ذبـح التمايـم

كلمات جدا رائعة و معاني اروع

كل الشكر لك

اخوي البتال الله لايحرمنا منك

و لا يحرمنا من نزيف قلمك

دمت بسعاده

المرجله ماهي بكلمـه وتنقـال



وتروح ماراحت هبوب النسايم




اخوي البتال يعطيك العافيه على


كلمات الرائعه جدا

وتقبل مروري ولك تحياتي

ابو تركي ___ حلى

شاااااااكر مروركم وعساكــــــــــم عــــ القوه