تغريد البعارين

سيرت يم واحد من الربع وتقوهيت عنده ومامن احد الا انا وهو وننتظر من يسير من الجماعه الكبيره

عشان تحلى التعليلة والمعزب حاصر الريموت وماغير يقلب بهالدش وقنوات الاغاني حصرا ومن

مزيونه لمزيونه وكل ماطلت اشوف خويي يهزهز براسه تقول بنقالي

واللي زاد اطين بله ..



اللي



زاد



الطين



بله ؟؟؟؟؟


معزبي يغني معها .. انتم ماعرفتو معزبي لوتعرفونه كان فهمتو الوضع

صار معذبي مو معزبي

عقب عايشة المرطه صار هيفا ونانسي واليسا وروبي

واللي يجنني اندماجه العنيف معهن

يغني معها يوم قالت .. رجب حوش صاحبك عني .. رجب صاحبك جنني

والالعن يحور بالكلمات

واللي فعلا دبل تسبدي بها فعلا
الاخ يعرف موقع ضحكتها فكل ماوصلت لضحكتها انعج معها امم امم امم هه

انا بدوري طبعا ( بحرت) لخويي (تبحيرة ) تأمل

ترا في فرق شاسع بين النظرة والتبحيرة ؟؟
التبحيرة عبارة عن النظرة العنيفة مع القليل من الحيرة في الحكم على ماترى

مدري بأغنيته هذي يبي يصرفني (عاد والله ماني ثقيل دم)
بس ماعندي احد اعرفه اسمه رجب عشان ينتخي به ويشكيله مني

المهم خلصت الاغنية وجت سحر عيونو لنانسي بنت رحمة عجرم وابو الشباب حاظها حتى هزة الراس يطبقها ..

استاذنت منه ( مامشيت ) لأ .. استاذنت منه طفيت الدش
المهم قام يتعبث بالدلال وابريق الشاي يبي يجددهن ويترنم

رجب حوش صاحبك عني ............. الخ
فقلت هذا النوع من الغناء بأسميه ((( تغريد البعارين )))

والى اللقاء مع موضوع جديد وهو ((( شقشقة الضبان )))

اسف على الاطالة ومااقول الا
ياشين السرج على البقر ..

والتحية للجميع

اخوكم / ضــــــــــــــــاري